ایران کے پاس جوہری ہتھیار موجود نہیں: بین الاقوامی جوہری توانائی ایجنسی کے ڈائریکٹر جنرل

?️ 4 نومبر 2026

سچ خبریں:بین الاقوامی جوہری توانائی ایجنسی کے ڈائریکٹر جنرل رافائل گروسی نے واضح کیا ہے کہ ایران کے پاس جوہری ہتھیار نہیں ہیں، تاہم انہوں نے تہران کے جوہری پروگرام اور یورینیم کی افزودگی کی سطح سے متعلق اپنے تحفظات بھی ظاہر کیے ہیں۔

روسی نشریاتی ادارے آر ٹی کے مطابق، رافائل گروسی نے اپنے ایک بیان میں کہا کہ ایران جوہری ہتھیار نہیں رکھتا۔ یہ بیان ایسے وقت میں سامنے آیا ہے جب امریکہ اور اسرائیل کی جانب سے ایران کی پُرامن جوہری تنصیبات پر حملوں کے دوران ان کے مؤقف پر تنقید کی جاتی رہی ہے۔

ایرانی حکام متعدد مواقع پر بین الاقوامی جوہری توانائی ایجنسی کے ساتھ وسیع تعاون کا حوالہ دیتے ہوئے کہہ چکے ہیں کہ ان کا جوہری پروگرام پُرامن مقاصد کے لیے ہے۔

گروسی نے ایران کی جوہری معلومات سے متعلق ایجنسی پر جاسوسی کے الزامات کا ذکر کیے بغیر دعویٰ کیا کہ ایران کا جوہری پروگرام انتہائی وسیع عزائم کا حامل ہے اور اس کے بعض پہلو تشویش ناک ہیں۔ ان کے مطابق تہران نے ان معاملات پر ایجنسی کو مطلوبہ شفافیت فراہم نہیں کی۔

انہوں نے کہا کہ ایران 60 فیصد تک یورینیم کی افزودگی جاری رکھے ہوئے ہے اور وہ واحد ملک ہے جس کے پاس جوہری ہتھیار نہیں، لیکن وہ یورینیم کو اس سطح تک افزودہ کر رہا ہے۔

بین الاقوامی جوہری توانائی ایجنسی کے سربراہ نے مزید کہا کہ ایک سفارت کار کی حیثیت سے وہ ہمیشہ سیاسی اور سفارتی حل تلاش کرنے کے خواہاں رہے ہیں۔

گروسی کے مطابق، آخری مرتبہ جب ہم نے کوہِ کلنگ کا معائنہ کیا تھا، اس کے اندر کوئی جوہری سرگرمی یا آلات موجود نہیں تھے۔ ہمیں ناظرین کو الجھن میں نہیں ڈالنا چاہیے؛ تہران کے پاس جوہری ہتھیار نہیں ہیں۔

انہوں نے یہ دعویٰ بھی کیا کہ حملوں کے نتیجے میں ایران کے جوہری پروگرام کے مادی ڈھانچے کو شدید نقصان پہنچا ہے۔