کیوبا کے خلاف امریکہ کے غیر قانونی اقدامات، ایران نے کیوبا حکومت کی مکمل حمایت کا اعلان کردیا

?️ 22 جولائی 2021

نیویارک (سچ خبریں) ایران نے امریکا کی جانب سے کیوبا کے خلاف غیر قانونی اقدامات کی شدید مذمت کرتے ہوئے انہیں بین الاقوامی قوانین کی خلاف ورزی قرار دیا اور کہا کہ اس جنگ میں ایران کیوبا حکومت اور عوام کی مکمل حمایت کرے گا۔

غیر ملکی خبررساں ایجنسی کے مطابق اقوام متحدہ میں ایران کے سفیر اور مستقل نمائندے نے غیروابستہ ممالک کی تحریک کے سفیروں کے اجلاس میں کیوبا کے عوام اور حکومت کے خلاف امریکا کی جانب سے غیرقانونی کارروائیوں کے خلاف جنگ میں بھرپور حمایت کا اعلان کردیا۔

نیویارک میں اقوام متحدہ میں اسلامی جمہوریہ ایران کے سفیر اور مستقل نمائندے مجید تخت روانچی نے بدھ کے روز غیروابستہ ممالک کی تحریک کے سفیروں کے خصوصی اجلاس سے خطاب کرتے ہوئے کیوبا کے بارے میں امریکی پالیسیوں کی معاندانہ اور اشتعال انگیز نوعیت کا حوالہ دیتے ہوئے  ان کو بین الاقوامی قوانین کے اصولوں اور بنیادی اصولوں کی واضح خلاف ورزی قرار دیا اور کہا کہ اس طرح کے اقدامات، انسانی حقوق اور جمہوریت کو مجروح کرتے ہیں۔

انہوں نے کہا کہ اسلامی جمہوریہ ایران نے امریکی اقدامات کے خلاف جنگ میں کیوبا کے عوام اور حکومت کے ساتھ اپنی بھر پور حمایت اور یکجہتی کا اعلان کیا ہے۔

اپنی گفتگو کے ایک اور حصے میں، مجید تخت راونچی نے غیروابستہ ممالک کی تحریک کے ممبروں کے خلاف یکطرفہ امریکی کارروائیوں کے جاری رہنے اور بین الاقوامی قوانین اور اقوام متحدہ کے چارٹر کی خلاف ورزی کی مذمت کرتے ہوئے کہا کہ کئی دہائیوں امریکا نے کرونا وائرس کے اندوہناک حالات میں بھی کچھ ممالک پر طرح طرح کی پابندیاں عائد کی ہیں جن کی وجہ سے انہیں تباہ کن مشکلات کا سامنا کرنا پڑا ہے۔

واضح رہے کہ منگل کو ایرانی وزیر خارجہ محمد جواد ظریف نے کیوبا کے اپنے ہم منصب سے ٹیلیفون پر بات کی تھی اور کیوبا کے اندرونی معاملات میں کسی بھی قسم کی غیر ملکی مداخلت کو مسترد کردیا تھا۔