غزہ کو خریدنے اور اس کا مالک بننے کے لیے پر عزم ہوں!:ٹرمپ

سچ خبریں:امریکی صدر ڈونلڈ ٹرمپ نے ایک بار پھر غزہ میں فلسطینیوں کے نسلی صفایا کے منصوبے کے نفاذ کی حمایت کی، جس سے عالمی سطح پر تنقید کا سامنا کیا گیا۔

الجزیرہ نیوز چینل کی رپورٹ کے مطابق، امریکی صدر ڈونلڈ ٹرمپ، جنہوں نے پہلے غزہ سے فلسطینیوں کے نسلی صفائے کے حوالے سے بیانات دے کر دنیا بھر میں غم و غصے کی لہر دوڑائی تھی، ایک مرتبہ پھر اپنے اس متنازعہ منصوبے پر زور دیا۔

یہ بھی پڑھیں: غزہ میں لوگوں کے رہنے کے لیے کوئی جگہ نہیں، انہیں منتقل ہونا چاہیے: ٹرمپ

ٹرمپ نے کہا کہ میں غزہ کو خریدنے اور اس کا مالک بننے کے لیے پر عزم ہوں اور اسے ایک ایسا مقام بناؤں گا جہاں مستقبل میں ترقی ہو، تاہم، شاید اس کا کچھ حصہ مشرق وسطیٰ کے ممالک کو دوں تاکہ وہ اس کی بحالی کے عمل میں حصہ لیں۔

انہوں نے مزید دعویٰ کیا کہ میں فلسطینیوں کی اہمیت کو سمجھتا ہوں اور میں یہ یقینی بناؤں گا کہ وہ مارے نہ جائیں۔

ٹرمپ نے یہ بھی کہا کہ ان کی حکومت فلسطینیوں کے ان معاملات پر بھی غور کرے گی جو امریکہ میں داخلے کی اجازت چاہتے ہیں۔

انہوں نے عرب ممالک سے فلسطینیوں کو قبول کرنے پر زور دیتے ہوئے کہا کہ میں سعودی ولیعہد محمد بن سلمان، مصری صدر عبدالفتاح السیسی اور دیگر عرب رہنماؤں سے بات کروں گا جو فلسطینی پناہ گزینوں کا استقبال کریں گے، مشرق وسطیٰ کے ممالک میرے ساتھ بات چیت کے بعد فلسطینی پناہ گزینوں کو قبول کریں گے۔

مزید پڑھیں: غزہ پر قبضہ کرنے کا ٹرمپ کا خیالی منصوبہ بے نقاب

روس کے صدر ولادیمیر پیوٹن کے ساتھ ملاقات کے حوالے سے سوال کا جواب دیتے ہوئے ٹرمپ نے کہا کہ میں وقت آنے پر پیوٹن سے ملاقات کروں گا اور اس سے اس معاملے میں پیش رفت ہوگی۔