برطانیہ، فرانس اور کینیڈا کا صیہونی مظالم پر سخت ردعمل

سچ خبریں:برطانیہ، فرانس اور کینیڈا کے رہنماؤں نے اسرائیل کو غزہ میں جاری فوجی حملے اور امدادی رکاوٹوں پر سخت وارننگ دیتے ہوئے کہا ہے کہ اگر یہ سلسلہ نہ رکا تو ان ممالک کی جانب سے عملی اقدامات کیے جائیں گے۔

الجزیرہ نیوز چینل کی رپورٹ کے مطابق برطانیہ، فرانس اور کینیڈا کے رہنماؤں نے ایک مشترکہ بیان میں خبردار کیا ہے کہ اگر اسرائیلی ریاست کی جانب سے غزہ میں فوجی حملے بند نہ کیے گئے اور امدادی سرگرمیوں پر عائد پابندیاں برقرار رہیں تو یہ ممالک عملی اقدام کرنے پر مجبور ہوں گے۔

یہ بھی پڑھیں: عالمی برادری نے مظلوم اقوام کی مدد کرنا کیوں بند کر دی: شیخ الازہر

رپورٹ کے مطابق، پیر کے روز جاری ہونے والے بیان میں برطانیہ، فرانس اور کینیڈا کے رہنماؤں نے کہا کہ اسرائیلی حکومت کی جانب سے غزہ میں صرف تھوڑی مقدار میں خوراک داخلے کی اجازت دینا بالکل ناکافی ہے۔

انہوں نے مزید کہا کہ ہم اسرائیلی حکومت سے مطالبہ کرتے ہیں کہ غزہ میں اپنی فوجی کارروائیاں فوری طور پر روک دے اور انسانی ہمدردی کی بنیاد پر مکمل امداد کی فراہمی کی اجازت دے۔

بیان میں مزید کہا گیا ہے کہ اسرائیل کی جانب سے غزہ کے عام شہریوں کو ضروری امداد فراہم کرنے سے انکار ناقابل قبول ہے۔ ہم اسرائیلی کابینہ کے بعض ارکان کی نفرت انگیز زبان اور جبری بے دخلی کی دھمکیوں کی شدید مذمت کرتے ہیں۔

 جبری نقل مکانی بین الاقوامی انسانی قوانین کی کھلی خلاف ورزی ہے۔ ہم دو ریاستی حل کے تحت فلسطینی ریاست کو تسلیم کرنے کے لیے پرعزم ہیں۔

مزید پڑھیں: عالمی برادری غزہ میں خون کی ندیوں کو روکے:غزہ کی حکومت

دویچے ویلے کے مطابق، برطانیہ، فرانس اور کینیڈا کے رہنماؤں نے اپنے بیان میں خبردار کیا کہ اگر اسرائیلی ریاست نے غزہ میں اپنی نئی فوجی کارروائی اور امدادی رکاوٹیں جاری رکھیں تو ان ممالک کی طرف سے باقاعدہ عملی اقدامات کیے جائیں گے۔