7 اکتوبر کے اسباق، اسرائیل اور مفاہمت پسند کی بڑی غلط فہمیاں

7 اکتوبر کے اسباق، اسرائیل اور مفاہمت پسند کی بڑی غلط فہمیاں

7 اکتوبر 2023 کو فلسطینی مزاحمتی تنظیموں کی جانب سے شروع کی گئی تاریخی کارروائی طوفان الاقصیٰ نے نہ صرف اسرائیل کے تمام سکیورٹی اور سیاسی حساب کتاب کو درہم برہم کر دیا بلکہ پورے خطے کے لیے نئے حقائق رقم کر دیے۔ اس آپریشن نے یہ ثابت کر دیا کہ جب تک فلسطین پر قبضہ برقرار ہے، مزاحمت ایک ناگزیر اور فطری راستہ رہے گا۔

صہیونی نظریہ ہمیشہ عربوں اور مسلمانوں کے خلاف برتری کے احساس پر قائم رہا۔ اسرائیل کی ہر جنگ کا مقصد یہی رہا کہ عربوں کو یہ باور کرایا جائے کہ وہ کسی بھی طرح اسرائیل کے برابر نہیں۔ لیکن لبنان اور فلسطین میں مزاحمت کی مسلسل کامیابیوں نے اس مغرور سوچ کو چیلنج کر دیا۔

حزب اللہ اور فلسطینی مزاحمت کی بیداری

2000 میں جنوبی لبنان سے اسرائیلی فوج کی ذلت آمیز واپسی کے بعد اسرائیل نے یہ سمجھنے میں دیر کر دی کہ یہ کامیابی فلسطینیوں کے لیے نئی امید بنے گی۔ جلد ہی دوسری انتفاضہ نے جنم لیا، اور فلسطینی عوام نے سمجھ لیا کہ صرف مزاحمت ہی آزادی کا واحد راستہ ہے۔

اسرائیل کی غلط حساب کتاب

2005 میں غزہ سے اسرائیل کی پسپائی کے بعد تل ابیب نے گمان کیا کہ مزاحمت ختم ہو جائے گی، لیکن حماس اور دیگر تنظیموں نے اس محاصرے کے باوجود اپنی عسکری، سیاسی اور تکنیکی صلاحیتوں کو بہتر بنایا۔ اسرائیل نے اسی دوران حزب اللہ کے خلاف 2006 کی جنگ چھیڑی، مگر ایک اور شکست اس کے حصے میں آئی۔

طوفان الاقصیٰ: ایک غیر متوقع جھٹکا

جب 7 اکتوبر 2023 کو حماس کے عسکری ونگ، کتائب عزالدین القسام نے کارروائی شروع کی، تو اسرائیل کے تمام سکیورٹی ادارے حیران رہ گئے۔ غزہ کی مزاحمتی قوتوں نے وہ دفاعی نظام توڑ ڈالا جسے اسرائیل نے اٹھارہ برس میں تیار کیا تھا۔ اس حملے نے اسرائیل کے انٹیلی جنس اور فوجی نظام کی کمزوری کو بے نقاب کر دیا۔

اسرائیل اور اس کے حامیوں کی بڑی غلطی

اسرائیل اور اس کے حامی عرب حکمرانوں نے یہ سمجھا کہ فلسطینی عوام تھک چکے ہیں، مگر طوفان الاقصیٰ نے اس غلط فہمی کو مٹا دیا۔ اس آپریشن نے واضح کر دیا کہ فلسطینی عوام اب بھی اپنی آزادی کے لیے ہر قیمت ادا کرنے کو تیار ہیں۔