غزہ میں صہیونی ریاست کی سفاکیت ایک بار پھر شروع

سچ خبریں:صیہونی ریاست نے غزہ میں نسل کشی اور جارحیت کو بڑھانے کے لیے نئے جنگی منصوبے کا آغاز کر دیا ہے، اس منصوبے کے تحت غزہ میں فلسطینیوں پر مزید حملے، جبری نقل مکانی اور مکمل قبضے کا ارادہ کیا گیا ہے۔

غزہ میں اسرائیلی ریاست کی جانب سے سفاکیت میں شدید اضافہ اور فلسطینی شہداء کی بڑھتی ہوئی تعداد اس بات کی نشاندہی کرتی ہے کہ صہیونی ریاست نے ایک نئے اور وسیع تر جنگی منصوبے کا آغاز کیا ہے، جو کئی مہینے جاری رہنے کا امکان ہے۔

یہ بھی پڑھیں: عالمی برادری نے مظلوم اقوام کی مدد کرنا کیوں بند کر دی: شیخ الازہر

الجزیرہ نیوز چینل کی رپورٹ کے مطابق، صہیونی ریاست کی سکیورٹی کابینہ نے رواں ماہ مئی کے آغاز میں آپریشن ارابہائے جدعون کی منظوری دی، جس کا دعویٰ یہ ہے کہ اس سے غزہ میں فوجی و سیاسی فتح حاصل کی جائے گی، مگر حقیقت میں اس کا مقصد فلسطینی شہریوں کے خلاف نسل کشی اور جارحیت کو جاری رکھنا ہے۔

اس آپریشن کو تین مراحل میں تقسیم کیا گیا ہے اور اس میں پانچ اہم دباؤ کے عوامل کے ذریعے فلسطینی اسلامی مزاحمتی گروہ حماس کو مجبور کرنے کی کوشش کی جائے گی کہ وہ قیدیوں کے تبادلے اور مزاحمت کو غیر مسلح کرنے کے معاہدے کو جنگ روکنے کے بغیر قبول کریں، اس سلسلے میں اسرائیلی فوج نے ہزاروں ذخیرہ فوجیوں کو طلب کرنا شروع کر دیا ہے۔

صہیونی میڈیا ایجنسی کے مطابق، 5 مئی کو جاری ہونے والی خبر میں بتایا گیا ہے کہ اس آپریشن کا بنیادی مقصد غزہ پر مکمل قبضہ کرنا ہے۔

 نام

یہ آپریشن عبرانی زبان میں مرکافوت جدعون کہلاتا ہے، جس کا مطلب ہے جدعون کی گاڑیاں، یہ نام صہیونی ریاست کے لیے تلمودی، تاریخی اور عسکری حوالہ جات رکھتا ہے، 1948 کی نکبۃ کے دوران صہیونیوں نے ایک اور فوجی آپریشن کو آپریشن جدعون کا نام دیا تھا، جس کا مقصد فلسطین کے علاقے بیسان کو قبضے میں لینا اور وہاں کے باشندوں کو جبراً بے دخل کرنا تھا۔

جدعون کی گاڑیاں کا نام اس بات کی علامت ہے کہ غزہ میں جنگ میں وسعت اور صہیونی ریاست کے اس خطے پر مکمل قبضے کے ارادے مضبوط ہیں، پیش گوئی کی جا رہی ہے کہ اس آپریشن کے نتیجے میں غزہ میں صہیونی ریاست کی وحشت میں بے پناہ اضافہ ہوگا، جیسے کہ بیسان میں آپریشن جدعون کے دوران بھی ہوا تھا، جب فلسطینیوں پر بے رحمانہ نسل کشی کی گئی، جدعون ایک توراتی کردار ہے جسے سفر قضاۃ میں ذکر کیا گیا ہے، اور اس کا معنی مجاہد ہے۔

یہ ان آخری آپریشنز میں سے ایک تھا جو صہیونی عسکریت پسند گروہ ہاگاناہ نے برطانوی انتداب کے اختتام سے قبل فلسطینیوں کے خلاف کیا۔ اس آپریشن کا مقصد بیسان شہر پر مکمل قبضہ تھا، جو 10 سے 15 مئی 1948 کے درمیان گولانی بریگیڈ کے ذریعے انجام پایا۔ اس میں صہیونیوں نے بے شمار فلسطینیوں کا قتل عام کیا اور علاقے کو اپنے قبضے میں لے لیا۔

اسرائیلی سرکاری میڈیا کے مطابق، اس آپریشن کا پہلا مرحلہ جنگ کے دائرے کو وسیع کرنا ہے، جس کا دورانیہ کئی مہینے ہو سکتا ہے۔ اس مرحلے میں شمالی غزہ کے تمام رہائشیوں کو مکمل طور پر نکال کر جنوب کی طرف دھکیلا جائے گا اور اسرائیلی فوج شمالی علاقوں میں تعینات ہوگی۔

صہیونی ریاست غیر فوجی کمپنیوں سے فوجی تعیناتی کا نقشہ تیار کروائے گی۔ اس منصوبے کے تحت رفح اور خط موراغ کے پیچھے والے علاقوں کو محفوظ قرار دیا جائے گا، تاہم وہاں داخلے کے لیے صہیونی افواج کی تلاشی لازمی ہوگی۔

اسرائیلی فوج کے مطابق دوسرے مرحلے میں انسانی بنیادوں پر آپریشن کا دعویٰ کیا گیا ہے، جس میں فضائی اور زمینی حملے شامل ہوں گے۔ اس دوران غیر فوجی آبادی کو رفح میں قائم کیے گئے محفوظ پناہ گاہوں میں منتقل کیا جائے گا۔

تیسرے مرحلے میں صہیونی ریاست شمالی غزہ کے بڑے حصوں پر تدریجی اور مکمل قبضے کی کوشش کرے گی، تاکہ اس خطے میں اپنی فوجی موجودگی کو طویل مدت کے لیے یقینی بنا کر حماس کا مکمل خاتمہ اور غزہ کی سرنگوں کی تباہی کو ممکن بنایا جا سکے۔

مزید پڑھیں: عالمی برادری غزہ میں خون کی ندیوں کو روکے:غزہ کی حکومت

واضح رہے کہ اس سے قبل بھی صہیونی ریاست شمالی غزہ پر مکمل قبضہ کر چکی ہے، لیکن اس طویل عرصے میں وہ حماس کی موجودگی اور ان کی سرنگوں کا خاتمہ کرنے میں ناکام رہی، اس دوران صہیونی فوج کو فلسطینی مزاحمت کی ہلاکت خیز کمین گاہوں کا بھی بارہا سامنا کرنا پڑا، جس کے نتیجے میں اس کے بے شمار فوجی مارے گئے۔