فرحان اختر کا کورونا کی جعلی ادویات بنانے، بیچنے والوں پر برہمی کا اظہار

?️ 3 مئی 2021

ممبئی(سچ خبریں)کورونا وبا کے پیش نظر جعلی ادویات اور دیگر سامان بنانے اور فروخت کرنے والوں پر بالی ووڈ اداکار و ڈائریکٹر فرحان اختر نے پر سخت برہمی کا اظہار کرتے ہوئے انہیں انتہائی گھٹیا انسان قرار دیا  اور کہا کہ آپ جو بھی کوئی ہیں آپ کو شرم آنی چاہئے۔

سماجی رابطے کی ویب سائٹ ٹوئٹر پر فرحان اختر نے بتایا کہ کورونا کی جعلی ادویات اور دیگر سامان بنانے اور بیچنے کی خبر دیکھی۔اس مایوسی اور اندھیرے کے وقت میں لوگوں کو دھوکا دینے کے لیے آپ کو ایک قسم کا عفریت بننا پڑے گا۔

انہوں نے مزید لکھا کہ آپ جو کوئی بھی ہیں آپ کو شرم آنی چاہیے۔واضح رہے کہ بھارت میں گزشتہ روز کورونا سے 3ہزار 689 افراد ہلاک ہوئے تھے جبکہ 3لاکھ 92 ہزار مزید نئے کیسز بھی سامنے آئے تھے۔ بھارت میں پہلے ہی سے لوگ کورونا کے علاج کے نام پر مختلف دوائیاں بنا کربیچ رہے ہیں اور اب موجودہ صورت حال میں بھی حکومت انہیں قابو نہیں کرسکی ہے۔

دوسری جانب گذشتہ روز جرمن فضائیہ کا ایک طیارہ 120 وینٹیلیٹرز اور طبی شعبے سے تعلق رکھنے والے 13 فوجیوں کو لے کر کورونا وائرس کی وبا سے شدید متاثرہ ملک بھارت پہنچ گیا۔غیرملکی خبررساں ادارے کے مطابق نئی دہلی پہنچنے والے اس فوجی طیارے میں عموما جرمن چانسلرانجیلا میرکل اور حکومتی اراکین سفر کرتے ہیں۔

مغربی شہر کولون سے روانہ ہونے والے اس ہوائی جہاز کے ساتھ 13 طبی ماہرین کی جو موبائل آکسیجن ٹیم بھارت پہنچی ہے، وہ آئندہ دو ہفتوں تک بھارت میں موبائل آکسیجن پروڈکشن یونٹوں کی تنصیب میں مدد کرے گی۔اس کے علاوہ یہ جرمن طبی وفد بھارت میں بین الاقوامی ریڈ کراس کی مدد بھی کرے گا۔