5اگست کو ”یوم استحصال کشمیر“کے طور پر منایا جائے گا،حریت کانفرنس نے ہڑتال کی کال دیدی

?️ 31 جولائی 2025

سرینگر: (سچ خبریں) بھارت کے غیر قانونی زیر قبضہ جموں وکشمیر میں کل جماعتی حریت کانفرنس نے لوگوں پر زور دیا ہے کہ وہ مودی حکومت کی طرف سے 5 اگست 2019 کو علاقے کی خصوصی حیثیت چھیننے کے غیر قانونی اقدام کیخلاف اپنا احتجاج ریکارڈ کرانے کیلئے پانچ اگست بروز منگل مکمل ہڑتال کریں اور اس دن کو ”یوم استحصال“ کشمیر کے طور پر منائیں۔
کشمیرمیڈیاسروس کے مطابق نریندر مودی کی سربراہی میں قائم بھارتیہ جنتا پارٹی(بی جے پی) کی بھارتی حکومت نے 5اگست 2019کو اقوام متحدہ کی قراردادوں اور بین الاقوامی قوانین کی کھلی خلاف ورزی کرتے ہوئے بھارتی آئین کی 370 اور 35اے دفعات ختم کر دی تھیں جن کے تحت بھارت کے غیر قانونی زیر قبضہ جموںوکشمیر کو خصوصی حیثیت حاصل تھی۔
کل جماعتی حریت کانفرنس کے ترجمان ایڈووکیٹ عبدالرشید منہاس نے سرینگر میں جار ی ایک بیان میں لوگوں پر زور دیا کہ وہ 5 اگست کو مکمل ہڑتال کریں تاکہ دنیا کو یہ واضح پیغام دیا جا سکے کہ کشمیری بھارت کے غیر قانونی اقدامات اوربین الاقوامی قوانیں کی خلاف ورزی کو تسلیم نہیں کرتے۔انہوںنے کہا کہ 5اگست کشمیریوں کیلئے سیاہ ترین دنوں میں سے ایک ہے جب بھارت نے انکی منفرد حیثیت اور شناخت چھین لی ۔ انہوںنے کہا کہ مودی حکومت نے مقبوضہ علاقے کو ایک بڑی جیل میں تبدیل کر کے کشمیریوں کے تمام بنیادی حقوق چھین لیے ہیں ۔ ترجمان نے کہا کہ بھارتی فورسز محاصرے او ر تلاشی کی کارروئیوں کے دوران نوجوانوں کو جعلی مقابلوں میں مسلسل شہید کر رہی ہیں جسکا عالمی برادری کو نوٹس لینا چاہیے۔
دریں اثنا کل جماعتی حریت کانفرنس اور مختلف آزادی پسند تنظیموں نے سرینگر اور مقبوضہ وادی کشمیر کے دیگر علاقوں میں پوسٹر چسپاں کیے ہیں جن میں درج تحریر میں اگست2019کے غیر قانونی بھارتی اقدامات کو مسترد کرتے ہوئے انہیں واپس لینے ، سیاسی نظر بندوں کی رہائی اور مسئلہ کشمیرکو اقوام متحدہ کی قراردادوں کے مطابق حل کرنے کا مطالبہ کیا گیا ہے۔پوسٹروں میں لکھا ہے کہ کشمیری بھارت کے نوآبادیاتی اقدامات کے خلاف اپنی مزاحمت جاری رکھیں گے۔ پوسٹرسماجی رابطوں کی سائٹوں ، فیس بک ، ایکس اور وٹس ایپ وغیرہ پر بھی اپ لوڈ کیے گئے ہیں۔