میر واعظ عمر فاروق کا بارشوں او سیلاب سے ہونیوالے جانی ومالی نقصانات پر اظہار دکھ اور افسوس

?️ 29 اگست 2025

سرینگر: (سچ خبریں) غیر قانونی طورپربھارت کے زیر قبضہ جموں وکشمیر میں کل جماعتی حریت کانفرنس کے سینئر رہنماء میر واعظ عمر فاروق نے مقبوضہ علاقے میں جاری بارشوں اورسیلاب سے ہونے والے جانی و مالی نقصان پر گہرے رنج و غم کا اظہار کیا ہے۔

کشمیرمیڈیاسروس کے مطابق میر واعظ عمر فاروق نے چھ سال سے عائد پابندی کے بعد آج حضرت خواجہ نقشبند بخاری کی درگاہ پر ایک بڑے اجتماع سے خطاب کرتے ہوئے بارشوں اورسیلاب سمیت قدرتی آفات سے نجات کی دعا کی اور کشمیریوں سے متاثرہ خاندانوں کی مدد کی اپیل کی ۔

انہوں نے کہاکہ کشمیری عوام کو قدرتی آفات سے متاثرہ اپنے بھائیوں کی مدد کیلئے امداد باہمی اور ہمدردی کے لیے اجتماعی کوششیں کرنی چاہیں۔حضرت خواجہ نقشبند کی ایمان و خدمت کی روایت کاحوالہ دیتے ہوئے میرواعظ نے یاد دلایا کہ آزمائش کے وقت اخلاص کے ساتھ اللہ کی طرف رجوع اور مصیبت زدگان کی امداد ہی حقیقی روحانی طاقت ہے۔

انہوں نے خبردار کیا کہ بادل پھٹنے ، شدید بارشوں اور سیلاب کے بڑھتے ہوئے واقعات دراصل انسانی لالچ اور فطرت میں بیجا مداخلت کا نتیجہ ہیں۔ ماحولیاتی طورپرحساس علاقوں میں ہوٹلوں اور ریزورٹس کی تعمیرات ، پہاڑوں کو کاٹ کر سڑکیں بنانا اور درختوں کی بے دریغ کٹائی براہِ راست ماحول کومتاثر کر رہی ہیں اور انسانی جانوں کو خطرے میں ڈال رہی ہیں۔

انہوں نے زور دیا کہ کشمیری عوام اورقابض حکام دونوں کی مشترکہ ذمہ داری ہے کہ وہ کوہ ہمالیہ کے اس خطے کے نازک ماحولیاتی توازن کو برقراررکھنے کے لیے دور اندیشی اختیار کریں، پائیدار طریقے اپنائیں اور فطرت کے قانون کا احترام کریں،جو ہماری اور آئندہ نسلوں کے تحفظ کا واحدذریعہ ہے۔اس موقع پر میرواعظ نے مزارِ شہدا نقشبند صاحب پر فاتحہ خوانی کی اور 13جولائی 1931کے شہدا کو خراج عقیدت پیش کرتے ہوئے کہا کہ ان کی قربانیاں کشمیریوں کیلئے آج بھی مشعل راہ ہیں۔ انہوں نے اہل ایمان سے تلقین کی کہ وہ دعا، ہمدردی، اتحاد اور ماحولیاتی ذمہ داری کا مظاہرہ کریں اوریاد رکھیں کہ آزمائشوں کا مقابلہ اجتماعی استقامت، ایمان اور اس دنیا کی شعوری دیکھ بھال کے ذریعے ہی ممکن ہے ۔