بھارت مقبوضہ جموں وکشمیرمیں یاترا کے نام پر پیراملٹری فورسز کی مزید300 کمپنیاں تعینات کررہا ہے

?️ 5 جون 2023

جموں: (سچ خبریں) بھارت آئندہ امرناتھ یاترا کی آڑ میں مقبوضہ جموں و کشمیر میں پیراملٹری فورسز کی 300 اضافی کمپنیاں تعینات کرنے کا منصوبہ بنا رہا ہے۔

کشمیر میڈیا سروس کے مطابق اس بات کی منظوری رواں ہفتے بھارتی وزارت داخلہ کے اعلی سطحی اجلاس میں دی جائے گی جس میں پولیس اور پیراملٹری فورسز کے اعلیٰ افسران بھی شرکت کریں گے۔قابض حکام نے صحافیوں کو بتایا کہ مقبوضہ جموں وکشمیرمیں پولیس کے مطالبے پرسالانہ یاترا کے لیے پیراملٹری فورسز کی 300اضافی کمپنیاں تعینات کی جائیں گی جو یکم جولائی سے شروع ہوگی اوررواں سال 31اگست یعنی 62دن تک جاری رہے گی جبکہ 200کمپنیوں کو اندرونی علاقوں میں تعینات کیا جائے گا۔

حکام نے بتایاکہ گزشتہ سال سالانہ یاترا کے لیے جموں و کشمیر کو پیراملٹری فورسز کی سب سے زیادہ 300کمپنیاں دی گئی تھیںکیونکہ یہ یاترا جموں و کشمیر کی خصوصی حیثیت کی منسوخی اور اس کی تقسیم کے بعد پہلی بار ہو رہی تھی۔ تاہم انہوں نے کہا کہ تشدد سے متاثرہ بھارتی ریاست منی پور میں بڑی تعداد میںپیراملٹری فورسز تعینات کی گئی ہیں اوراس بات کا کوئی امکان نہیں لگتا کہ انہیں اگلے 15سے 20دنوں میں واپس بلایاجائے گا۔اس سال یاترا بھی دو ماہ سے کچھ ہی زیادہ عرصے تک جاری رہے گی۔فورسز کی زیادہ تر اضافی کمپنیاں سینٹرل ریزرو پولیس فورس (CRPF) پر مشتمل ہیں جبکہ دیگر کا تعلق انڈو تبتین بارڈر پولیس (ITBP) اور سینٹرل انڈسٹریل سیکورٹی فورس (CISF) سے ہے ۔