17 جولائی کے الیکشن کیلئے پی ٹی آئی فیورٹ قرار

?️ 8 جولائی 2022

لاہور: (سچ خبریں) پنجاب ضمنی الیکشن میں تحریک انصاف فیورٹ قرار۔ تفصیلات کے مطابق 17 جولائی کو شیڈول پنجاب کے 20 حلقوں کے ضمنی الیکشن سے قبل نجی ٹی وی چینل کی جانب سے ان حلقوں کے ووٹرز کی رائے جانے کیلئے ایک سروے کیا گیا۔

سروے میں تحریک انصاف کو عوام کی اکثریت کی حمایت حاصل ہے، 17 جولائی کے الیکشن کیلئے پی ٹی آئی واضح طور پر فیورٹ لگ رہی ہے۔

ایک طرف عوام مہنگائی کی موجودہ صورتحال کی وجہ سے پی ڈی ایم کی حکومت سے سخت نالاں ہے، تو دوسری جانب عمران خان کا بیانیہ بھی بے حد مقبولیت حاصل کر چکا ہے۔ نجی ٹی وی کی رپورٹ کے مطابق ضمنی الیکشن والے حلقوں میں عوام کی رائے کی موجودہ صورتحال کے مطابق تحریک انصاف کو اکثریتی نشستوں پر فتح حاصل ہونے کا امکان ہے۔

تحریک انصاف کو 16 جبکہ ن لیگ کو 4 نشستوں پر فتح ملنے کا امکان ظاہر کیا گیا ہے۔

خاص کر ن لیگ کے گڑھ لاہور میں بھی سوائے ایک نشست کے، باقی تمام نشستوں پر تحریک انصاف کا پلڑہ بھاری بتایا گیا ہے۔ دوسری جانب سے پاکستان تحریک انصاف کے چیئرمین عمران خان ضمنی ا الیکشن سے قبل حکومت پر دھاندلی کی کوششوں کا الزام عائد کر رہے ہیں، جبکہ یہ دعویٰ بھی کر رہے ہیں کہ تحریک انصاف تمام کی تمام 20 نشستوں پر فتح حاصل کرے گی۔ جمعرات کے روز بھی ضمنی الیکشن کی مہم کے سلسلے میں شیخوپورہ میں منعقدہ جلسے میں عمران خان نے کہا کہ انتخابی حلقوں میں ووٹ لینے کیلئے پیسے بانٹے جا رہے ہیں، لوگوں کو پیغام ہے 10، 10ہزارکے چیک ان سے لینا اور ٹھپہ بلے پر لگانا، الیکشن جیتنے کیلئے عوام گھر گھر جائیں ، الیکشن سے فیصلہ ہوگا کہ یہ ملک آزاد خودمختار ہوگا یا پھرچوروں کا ملک بنے گا۔

مجھے اتنا تجربہ ہوگیا ہے اس لیے مبارکباد دیتا ہوں کہ آپ الیکشن جیت چکے ہیں، ٹیم بن کر لڑیں گے تو کوئی شکست نہیں دے سکتا، کسی بھی رنگ کا لوٹا جنون کا مقابلہ نہیں کرسکتا، لوٹوں پر بڑا نوٹ خرچ کیا جا رہا ہے، الیکشن کمیشن حمزہ سے مل کر لوٹوں کو جتانے کی کوشش کررہا ہے، یہ کچھ بھی کرلیں جیت نہیں سکتے۔