اسلام آباد (سچ خبریں) وفاقی وزیر اطلاعات فواد چوہدری کا کہنا ہے کہ وزیر اعظم عمران خان نےدنیا کے سامنے بھارت کا فاشسٹ چہرہ بے نقاب کیا۔ بھارتی حکومت کی جانب سے مسلمانوں پر ظلم سے متعلق وزیراعظم نےسب کو باور کرایا کیسے بھارتی فاشسٹ حکومت اقلیتوں کا قتل عام کر رہی ہے۔
وزیراعظم عمران خان نے دنیا کو بتایا کہ افغانستان کو تنہا چھوڑنا خطرناک ہوگا۔وفاقی وزیر نے کہا کہ وزیراعظم کے خطاب کے چار بنیادی موضوعات تھے، وزیراعظم نے مسئلہ کشمیر، افغانستان کی صورتحال، غریب ملکوں سے لوٹی ہوئی دولت اور ماحولیات کے بارے میں مدلل اور جامع گفتگو کی۔
دوسری جانب وفاقی وزیر علی امین گنڈاپور نے وزیراعظم کوجنرل اسمبلی سے خطاب پر خراج تحسین پیش کرتے ہوئے کہا کہ وزیراعظم عمران خان نے کشمیری عوام کے دل جیت لیے اور ثابت کیا کہ وہ ایک حقیقی اسٹیٹس مین ہیں۔
علی امین گنڈاپور کا کہنا تھا کہ عمران خان نےنہ صرف خطے، بلکہ دنیا کودرپیش چیلنجز کا احاطہ کیا جبکہ اسلاموفوبیا اور ماحولیاتی تبدیلی جیسے مسائل کو اجاگر کیا۔ وزیراعظم نے بھارتی سفاکیت اور بھارت میں مسلمانوں پرمظالم کو دنیا کے سامنے بے نقاب کیا، وزیراعظم کے خطاب سے مسئلہ کشمیر پر عالمی حمایت میں اضافہ ہو گا۔
