ملتان: پولیس کا سینئر سیاستدان جاوید ہاشمی کی رہائش گاہ پر چھاپہ، رشتے دار گرفتار

🗓️ 5 فروری 2024

اسلام آباد: (سچ خبریں) پنجاب پولیس نے رات گئے سینئر سیاستدان جاوید ہاشمی کی رہائش گا پر چھاپا ما را ہے۔ جاوید ہاشمی کی ملتان میں واقع رہائش گاہ پر رات گئے چھاپا مارا گیا ہے۔ جاوید ہاشمی کے نواسے قاسم ہاشمی نے دعویٰ کرتے ہوئے پولیس کے چھاپے سے متعلق بتایا۔

قاسم ہاشمی نے الزام عائد کیا کہ رات گئے پولیس نے جاوید ہاشمی کی رہائش گاہ پر چھاپہ مارا، جاوید ہاشمی کی غیر موجودگی پر پولیس ان کے قریبی رشتہ دار کوگرفتار کرکے لےگئی۔

واضح رہے کہ گزشتہ ہفتے ملتان میں پولیس کی بھاری نفری سینیئر سیاستدان جاوید ہاشمی کے گھر کے باہر پہنچ گئی تھی، جاوید ہاشمی کے داماد زاہد بہار ہاشمی پنجاب اسمبلی کی نشست پر آزاد حیثیت میں الیکشن لڑ رہے ہیں۔

واضح رہے کہ اس کارروائی سے 2 روز قبل پنجاب پولیس نے جاوید ہاشمی کی رہائش گاہ پر ورکرز کنونشن کروانے کے خلاف مقدمہ درج کرلیا تھا جس میں سینئیر سیاستدان کے 2 داماد اور 2 نواسوں سمیت 36 افراد کو نامزد کیا گیا تھا۔

یاد رہے کہ مقدمہ درج کیے جانے سے ایک روز قبل مخدوم جاوید ہاشمی کی رہائش گاہ پر پولیس نے چھاپہ مار کر ان کے داماد اور نواسے سمیت 8 ملازمین کو گرفتار کر لیا تھا۔

جاوید ہاشمی کی رہائش گاہ پر یہ چھاپہ پی ٹی آئی کے ورکرز کنونشن کے دوران مارا گیا تھا جس میں مہر بانو قریشی اور زین قریشی کو بھی شرکت کرنا تھی، چھاپے کے دوران گرفتار ہونے والے ان کے داماد زاہد بہار ہاشمی آزاد امیدوار ہیں۔

یاد رہے کہ 22 جنوری کو جاوید ہاشمی نے عام انتخابات سے دستبردار ہونے کا اعلان کردیا تھا۔

ملتان میں میڈیا سے گفتگو کرتے ہوئے جاوید ہاشمی نے کہا تھا کہ وہ کسی کے حق میں نہیں لیکن الیکشن سے دستبردار ہو رہے ہیں۔

انہوں نے کہا تھا کہ وہ اپنا سیاسی وزن تحریک انصاف کے پلڑے میں ڈالتے ہیں اور الیکشن سے دستبردار ہوتے ہیں۔