ذوالفقار بھٹو کو 50 سال بعد انصاف مل گیا، اچھا ہو اگر ہمیں جیتے جی انصاف مل جائے، ڈاکٹر یاسمین راشد

🗓️ 7 مارچ 2024

لاہور: (سچ خبریں) پاکستان تحریک انصاف کی رہنماء ڈاکٹر یاسمین راشد نے کہا ہے کہ ذوالفقار بھٹو کو 50 سال بعد انصاف مل گیا، اچھا ہو اگر ہمیں جیتے جی انصاف مل جائے۔

انسدادہشتگردی عدالت میں صحافیوں سے غیر رسمی گفتگو میں ڈاکٹر یاسمین راشد  نے کہا کہ بڑی اچھی بات ہے کہ 50 سالوں بعد ذوالفقار بھٹو کو انصاف مل گیا، عدلیہ نے اپنی غلطی کو تسلیم کرلیا، ہم بھی دس ماہ سے جیلوں میں انصاف ملنے کی امید کر رہے ہیں اچھا ہو کہ ہمیں زندہ کو انصاف مل جائے، عدلیہ سے ہم امید رکھتے ہے کہ ہمیں انصاف کے لیے 50 سال انتظار نہ کرنا پڑے۔

سابق صوبائی وزیر نے کہا کہ قوم کے پیسوں کو ذاتی تشہیر کے لیے اڑایا جا رہا ہے، راشن کے سامان پر نواز شریف کی تصویر تب لگائیں جب آپ راشن اپنی جیب سے دیں یہ قوم کا پیسہ ہے، مریم بی بی آپ کی خوشی اور فرمائش کو پوری کرتے ہوئے آپ کو وزیر اعلی بنا کر سارے نظام کو تباہ کیا گیا، مریم بی بی نے کہا کہ لڑکیوں کو تنگ کیا تو مھجے سے برا کوئی نہیں ہوگا ،مریم بی بی آپ سے برا تو پہلے بھی کوئی نہیں۔

ادھر وزیراطلاعات پنجاب عظمیٰ بخاری نے کہا ہے کہ پہلی بار ملک میں خاتون وزیراعلیٰ بنی ہیں، خواتین کے حوالے سے وزیراعلیٰ پنجاب بہت حساس ہیں، مریم نواز نے کہا ہے خواتین کی سیفٹی کے حوالے سے ایک ایپ متعارف کرائی جائے، ’نیور اگین‘ کے نام سے ایپ متعارف کرائی جائے گی جسے وزیراعلیٰ پنجاب خود مانیٹر کریں گی، خواتین کے تحفظ کے حوالے سے جو بھی اقدامات ہیں وہ کریں گے۔

انہوں نے کہا کہ وزیر اعلیٰ کا وژن اور کام کرنے کی رفتار دیکھ کر پی ٹی آئی پر سکوت مرگ طاری ہے، مریم نوازاور ان کی ٹیم اتنا کام کرے گی کہ 5 سال بعد پی ٹی آئی کا نام و نشان مٹ جائے گا، دوسرے کے کیے ہوئے کاموں کا کریڈٹ لینا پی ٹی آئی کا وطیر ہ ہے، جھوٹ بولنے میں پی ٹی آئی والے شیطان کو بھی مات دے دیتے ہیں، پی ٹی آئی نے جھوٹ بولنے اور سچ سے گریز کی قسم کھائی ہوئی ہے۔