جمیعت علمائے پاکستان (نورانی گروپ) کا انتخابات میں پیپلزپارٹی کی حمایت کا اعلان

🗓️ 21 جنوری 2024

سید صفدر شاہ گیلانی نے کہا کہ جے یو پی (نورانی گروپ) ملک بھر میں پیپلز پارٹی امیدواران کی حمایت کرتی ہے اور اپنے امیدواران دستبردار کرنے کا اعلان کرتی ہے۔

انہوں نے کہا کہ پیپلز پارٹی فرقہ واریت کے خلاف ہے اس لیے حمایت قومی فریضہ ہے، صوبہ سندھ، پنجاب، بلوچستان، خیبر پختونخواہ اور وفاق کے حلقہ جات سے جے یو پی کے امیدواران کاغذات نامزدگی واپس لے لیں گے۔

اس موقع پر رہنما پیپلزپارٹی نیئر بخاری نے کہا کہ جے یو آئی نورانی گروپ کی حمایت کے شکر گزار ہیں۔

انہوں نے کہا کہ پیپلز پارٹی حقیقی مذہبی قائدین و اکابرین کا احترام و عزت دینے والی جماعت ہے، پیپلز پارٹی عوام الناس کی نمائندہ جماعت ہے، پیپلزپارٹی ملک کو معاشی گرداب سے نکال سکتی ہے۔

انہوں نے مزید کہا کہ چیئرمین بلاول بھٹو زرداری امیدِ پاکستان ہیں، وہ باصلاحیت لیڈر ہیں۔

نیئر بخاری نے کہا کہ بانی پیپلز پارٹی ذوالفقار علی بھٹو اور شہید جمہوریت بےنظیر بھٹو کی وطن اور قوم کے لیے یادگار خدمات ہیں۔

انہوں نے کہا کہ پیپلز پارٹی کے عوامی معاشی معاہدے میں ملکی مسائل کا حل موجود ہے، پیپلز پارٹی عوامی خدمات کارکردگی پر ہر بار عوامی عدالت سے سرخرو ہوتی ہے۔

انہوں نے مزید کہا کہ پیپلز پارٹی اقتدار میں لائے جانے والی پشت پناہی کی بجائے عوامی پشتی بانی پر یقین رکھتی ہے، جو لے کر آئیں انہیں ہی آنکھیں دکھانے والوں کا حشر عوام کے سامنے ہے۔

جے یو پی کے وفد میں سعید احمد نقشبندی، انوار زمن کاظمی، صاحبزادہ نزیری، طائر رشید تنولی اور اسرار چیمہ ایڈوکیٹ شامل تھے۔

ملاقات میں سیکرٹری جنرل پیپلز پارٹی نیئر حسین بخاری کے علاوہ امیدوار پیپلزپارٹی حلقہ 47 سید سبط الحیدر بخاری اور ترجمان راجا نور الہیٰ بھی موجود تھے۔