او آئی سی کے سیکرٹری جنرل نے پاکستان کا شکریہ ادا کیا

?️ 20 دسمبر 2021

اسلام آباد (سچ خبریں)  تفصیلات کے مطابق او آئی سی کے سیکرٹری جنرل حسین ابراہیم طہٰ اسلام آباد ایئرپورٹ سے روانہ ہوگئے، ان کے ہمراہ انڈونیشیا، اردن، کرغستان ، قازقستان، بنگلہ دیش، سیرالیون کے وفود بھی روانہ ہوئے، وزیر مملکت اطلاعات فرخ حبیب اور وزیرمملکت علی محمد خان نے مہمانوں کو الوداع کیا۔
اسلام آباد سے روانگی کے موقع پر سیکرٹری جنرل او آئی سی نے میڈیا سے بات کرتے ہوئے کہا کہ کانفرنس کے کامیاب انعقاد پر پاکستان کے عوام اور حکومت کا شکر گزار ہوں، کل کی کانفرنس کامیاب رہی جو ایک خوش آئند بات ہے، اس اجلاس سے خطے بالخصوص افغانستان میں انسانی صورتحال میں بہتری آئے گی۔

او آئی سی کے جنرل سیکریٹری حسین طحٰہ نے کہا کہ او آئی سی وزرائے خارجہ کونسل کی جانب سے افغانستان کے موجودہ حالات پر افغان عوام کی مدد کے لیے عالمی فنڈ کا قیام اور افغانستان کے لیے اوآئی سی کے خصوصی نمائندہ کی تعیناتی کا فیصلہ کیا گیا ہے۔

انہوں نے کہا کہ امید ہے کہ اسلامی تعاون تنظیم کے رکن ممالک کے علاوہ دیگر ممالک بھی اس فنڈ میں حصہ ڈالیں گے،غیر معمولی اجلاس کی کامیابی خوش آئند ہے،توقع ہے کہ اس سے خطے بالخصوص افغانستان میں بہتری آئے گی۔ یہ غیر معمولی اجلاس ایک بڑی کامیابی تھا،خطے میں ہونی والی پیش رفت کے حوالے سے یہ اجلاس اہم تھا۔ انہوں نے کہا کہ اجلاس میں افغانستان کے لیے حوصلہ افزاء اعلانات کیے گئے ہیں، مستقبل قریب میں وزراء خارجہ کی اس کانفرنس کے تاریخی اثرات مرتب ہوں گے۔ اس موقع پر وزیر مملکت اطلاعات فرخ حبیب نے کہا کہ پاکستان آمد پر سیکرٹری جنرل او آئی سی کے شکرگزار ہیں۔