آرمی چیف ایک روزہ سرکاری دورے پر افغانستان پہنچ گئے

🗓️ 10 مئی 2021

کابل(سچ خبریں) چیف آف آرمی اسٹاف جنرل قمر جاوید باجوہ اپنے ایک روزہ دورے پر افغانستان پہنچ گئے ہیں جہاں وہ   افغان حکام سے اہم ملاقاتیں کریں گے جس میں باہمی دلچسپی کے امور پر تبادلہ خیال کیا جائے گا۔افغان میڈیا کے مطابق آرمی چیف کا افغان نیشنل سیکیورٹی ایڈوائزر حمد اللّٰہ محب نے استقبال کیا۔

پاک فوج کے شعبہ تعلقات عامہ آئی ایس پی آر کی جانب سے جاری بیان کے مطابق آرمی چیف جنرل قمر جاوید باجوہ نے افغانستان کا دورہ کیا، دورے میں آرمی چیف سے افغان صدر اشرف غنی نے تفصیلی ملاقات کی ، اہم ترین ملاقات میں برطانوی چیف آف ڈیفنس بھی موجود تھے۔

آئی ایس پی آر کے مطابق ملاقات میں باہمی دلچسپی،افغان مفاہمتی عمل میں تازہ صورتحال پر تبادلہ خیال کیا گیا ساتھ ہی سیکیورٹی، دفاعی تعاون، مؤثربارڈر مینجمنٹ پربھی غور کیا گیا۔آئی ایس پی آر کے مطابق افغان صدر سے ملاقات میں جنرل قمر جاوید باجوہ نے کہا کہ پرامن افغانستان کا مطلب پاکستان اور خطےمیں امن ہے۔

ان کا کہنا تھا کہ پاکستان افغان عوام کے دیر پا امن کی کوششوں کی حمایت کرتارہےگا۔آئی ایس پی آر کے مطابق اہم ترین ملاقات میں افغان صدر نے بامقصدبات چیت،افغان مفاہمتی عمل میں سنجیدہ کردار پر آرمی چیف کا شکریہ ادا کیا۔ واضح رہے پاکستانی حکام نے افغانستان میں قیام امن کے لئے کافی کوششیں کی ہیں اور پاکستان افغان میں امن کا خواہاں ہے۔