آئی ایس پی آر سمر انٹرن شپ 2025 کا سفر کامیابی سے اختتام پذیر

?️ 23 اگست 2025

راولپنڈی (سچ خبریں) آئی ایس پی آر سمر انٹرن شپ 2025 کا سفر کامیابی سے اختتام پذیر ہوگیا، پاکستان کی سب سے بڑی انٹرن شپ میں مُلک بھر سے طلبہ کی کثیر تعداد نے بڑھ چڑھ کر حصہ لیا۔

آئی ایس پی آر کی 6 ہفتوں پر مشتمل سمر انٹرن شپ میں 33 شہروں کے 6500 سے زائد طلبہ نے شرکت کی، ملک بھر کے 150 سے زائد سرکاری و غیر سرکاری تعلیمی اداروں سے طلبہ شریک ہوئے۔

تعلیم و تربیت سے بھر پور سمر انٹرن شپ میں ملک کی نامور شخصیات کی طلبہ سے خصوصی نشستوں کا انعقاد کیا گیا، طلبہ نے پی ایم اے کاکول، این سی ٹی سی پبی، پاکستان آرڈیننس فیکٹری واہ سمیت متعدد فوجی تنصیبات کا دورہ بھی کیا۔

طلبہ نے پاک افواج کی آپریشنل تیاریوں اور صلاحیتوں کا بھی جائزہ لیا جبکہ ڈی جی آئی ایس پی آر لیفٹیننٹ جنرل احمد شریف چودھری کے ساتھ سمر انٹرن شپ کے طلبہ کی خصوصی نشستوں کا بھی انعقاد کیا گیا۔

طلبہ کا کہنا ہے کہ سمر انٹرن شپ سے بہت کچھ سیکھنے کو ملا ہے۔ انٹرن شپ کے اختتام پر طلبہ کو آئی ایس پی آر کی جانب سے اعزازی سند سے بھی دی گئی ہے۔