پاک بھارت کی تاریخ کی سب سے بڑی فضائی لڑائی:سی این این

?️ 9 مئی 2025

سچ خبریں:سی این این کی رپورٹ کے مطابق حالیہ پاک بھارت کشیدگی کے دوران دونوں ممالک کے درمیان ایک گھنٹہ طویل فضائی معرکہ ہوا جس میں 125 جنگی طیارے شریک ہوئے یہ جنگی ہوا بازی کی تاریخ کی بڑی لڑائیوں میں سے ایک سمجھی جا رہی ہے۔

ایک پاکستانی فوجی ذریعے نے سی این این کو بتایا ہے کہ بھارت کی جانب سے حالیہ حملے کے دوران، دنیا کی سب سے بڑی اور طویل ترین فضائی لڑائیوں میں سے ایک پیش آئی، جو دونوں ملکوں کی فضائی افواج کے درمیان ہوا۔

یہ بھی پڑھیں:قومی سلامتی کمیٹی نے پاکستان کی مسلح افواج کو جوابی کارروائی کی اجازت دے دی

اس ذریعے کے مطابق، یہ فضائی لڑائی (ڈاگ فائٹ) ایک گھنٹے سے زیادہ جاری رہی اور اس میں دونوں طرف سے مجموعی طور پر 125 جنگی طیاروں نے حصہ لیا۔

ڈاگ فائٹ ان فضائی معرکوں کو کہا جاتا ہے جن میں جنگی طیارے انتہائی قریب سے ایک دوسرے کے خلاف پیچیدہ اور تیز رفتار مانور کرتے ہیں تاکہ یا تو دشمن کو نشانہ بنائیں یا اس سے بچ نکلیں۔

یہ پائلٹس کے لیے سب سے خطرناک اور دشوار ترین تجربات میں سے ایک مانا جاتا ہے، جس میں چکر کھاتے، بلندی پر جاتے اور مارپیچ حرکتیں شامل ہوتی ہیں۔

پاکستانی ذرائع نے تصدیق کی کہ دونوں ممالک کے جنگی طیاروں نے ایک دوسرے کی فضائی حدود کی خلاف ورزی سے گریز کیا۔ بعض مقامات پر میزائلوں کا تبادلہ 160 کلومیٹر سے زیادہ فاصلے پر بھی ہوا۔

ذرائع نے مزید کہا کہ دونوں ممالک نے جان بوجھ کر اپنی سرحدوں کے اندر رہتے ہوئے کارروائی کی تاکہ 2019 جیسے واقعات دوبارہ نہ دہرائے جائیں جب ایک بھارتی پائلٹ کو پاکستان نے گرفتار کر کے دنیا کے سامنے پیش کیا تھا،اس واقعے نے بھارت کے لیے شدید سفارتی و عسکری شرمندگی پیدا کی تھی، جس سے دونوں فریق اب بچنا چاہتے ہیں۔

مزید پڑھیں:پاکستان پر بھارتی میزائل حملے مودی حکومت کے ہندو توا ایجنڈے کا تسلسل ، حریت کانفرنس

ذرائع کے مطابق، بعض بھارتی حملوں میں کئی بار ایک ہی ہدف کو نشانہ بنایا گیا، جبکہ پاکستان نے اپنی انٹیلیجنس اور فضائی نگرانی کے ذریعے شہری علاقوں کو بروقت وارننگ دی، جس کے نتیجے میں عام شہریوں کی جانوں کا ضیاع کم سے کم ہوا۔