مراکش (سچ خبریں) افریقی ملک مراکش نے فلسطینیوں کے ساتھ دشمنی کا ثبوت دیتے ہوئے نو منتخب انتہا پسند اسرائیلی وزیراعظم کو عہدہ سنبہالنے پر مبارکباد پیش کرتے ہوئے ہر قسم کا تعاون کرنے کی یقین دہانی کرا دی۔
تفصیلات کے مطابق افریقی ملک مراکش کے بادشاہ محمد ششم نے قابض اسرائیل کے نئے وزیر اعظم، نفتالی بینیٹ کو ان کے منصب پر فائز ہونے پر مبارکباد پیش کرتے ہوئے اس بات کی یقین دہانی کرائی ہے کہ مراکش ہر شعبے میں اسرائیل کا تعاون کرتا رہے گا۔
غیرملکی خبررساں ادارے کے مطابق مراکشی شاہی دربار کے مطابق شاہ محمد ششم نے بینیٹ کو ایک تہنیتی پیغام بھیجا جس میں انہوں نے کہا کہ میں اسرائیل کے وزیر اعظم کے طور پر آپ کے انتخاب کے موقع پر خوش ہوں کہ آپ نے اپنے عظمت کا اظہار کیا، میری نیک تمنائیں اور آپ کے بلند تر کاموں میں کامیابی کے لیے آپ کے ساتھ ہیں۔
انہوں نے مزید کہا کہ میں اس موقع پر آپ کو یقین دلاتا ہوں کہ مراکش کی حکومت اسرائیل کے ساتھ تمام شعبوں میں تعاون اور تعلقات کو مزید مستحکم کرے گی۔
ان کا کہنا تھا کہ توقع ہے کہ اسرائیل کی نئی حکومت کے دور میں تل ابیب اور رباط کے درمیان تعلقات مزید مستحکم ہوں گے۔
واضح رہے کہ مراکش نے امریکی ثالثی کے تحت 10 دسمبر کو قابض اسرائیل کے ساتھ تعلقات معمول پر لانے کا اعلان کیا تھا، سابق امریکی صدر ڈونلڈ ٹرمپ کی انتظامیہ نے صحارا کے علاقے پر مراکش کی خودمختاری کو تسلیم کیا تھا جس کے بعد مراکش نے مراکش اسرائیل کے ساتھ تعلقات معمول پر لانے کا اعلان کیا تھا۔
