شمال مغربی شام میں الجولانی کے دہشتگرد گروہ کے حملوں میں کتنے شہری مارے گئے ہیں؟امریکہ کا اعتراف 

سچ خبریں:امریکی نیشنل انٹیلیجنس ادارے (ODNI) کی سالانہ رپورٹ میں ایک چونکا دینے والا انکشاف سامنے آیا ہے، جس میں اعتراف کیا گیا ہے کہ شام کے شمال مغربی علاقوں میں سرگرم دہشتگرد گروہ ہیئت تحریر الشام کے سرغنہ ابو محمد الجولانی اور اس کے ساتھیوں نے حالیہ ہفتوں میں 1,000 سے زائد بے گناہ شہریوں کو قتل کیا۔

یہ بھی پڑھیں:شام میں علویوں کا قتل عام روانڈا نسل کشی کے مترادف ہے:روس  

لبنانی چینل المیادین کی رپورٹ کے مطابق، امریکی انٹیلیجنس رپورٹ میں کہا گیا ہے کہ ہیئت تحریر الشام اور اس کے اتحادی گروہ حراس الدین نے رواں ماہ شمال مغربی شام میں مذہبی اقلیتوں کو نشانہ بناتے ہوئے وسیع پیمانے پر پرتشدد کارروائیاں کیں، جن میں علوی اور عیسائی برادری کے افراد شامل تھے۔

رپورٹ کے مطابق، دہشتگرد تنظیم داعش شام میں دوبارہ منظم ہو رہی ہے اور اس نے الجولانی کی قیادت والے نظام پر حملے کی منصوبہ بندی شروع کر دی ہے۔

رپورٹ میں کہا گیا ہے کہ شام میں سیاسی عدم استحکام، اقتدار کی تبدیلی اور بیرونی مداخلت نے ملک کو ایک طویل عرصے سے بے یقینی اور انتشار کا شکار بنا رکھا ہے، جس کا نتیجہ داعش اور دیگر دہشتگرد گروہوں کے دوبارہ فعال ہونے کی صورت میں نکل سکتا ہے۔

یہ رپورٹ ایک ایسے وقت پر سامنے آئی ہے جب امریکہ خود ماضی اور حال میں الجولانی اور اس کے زیر قیادت گروہوں کی براہ راست یا بالواسطہ حمایت کرتا رہا ہے۔

کئی رپورٹس اور تجزیے اس حقیقت کی نشاندہی کر چکے ہیں کہ امریکا نے ان گروہوں کو شام میں حکومتِ بشار الاسد کے خلاف ایک کارآمد ہتھیار کے طور پر استعمال کیا۔

مزید پڑھیں:شام میں الجولانی پر کندھوں پر رکھ کر کون بندوق چلا رہا ہے؟؛امریکی اخبار کی رپورٹ

تجزیہ کاروں کا کہنا ہے کہ یہ امریکی اعتراف نہ صرف زمینی حقائق کی تصدیق کرتا ہے بلکہ خود امریکا کی مداخلت پسندانہ اور دوغلی پالیسی پر بھی سوالیہ نشان اٹھاتا ہے کیونکہ وہ ایک طرف انسانی حقوق کے دعوے کرتا ہے اور دوسری طرف دہشتگرد گروہوں کی پشت پناہی کرتا ہے۔