مسجد الاقصیٰ کے خطیب کی فلسطینیوں سے شبِ قدر میں مسجدالاقصیٰ پہنچنے کی اپیل

سچ خبریں:مسجد الاقصیٰ کے خطیب شیخ عکرمہ صبری نے فلسطینی عوام سے اپیل کی ہے کہ وہ ماہ رمضان کی مقدس رات، شبِ قدر کے اعمال کے لیے مسجد الاقصیٰ آئیں اور صہیونی ریاست کی جانب سے مسجد الاقصیٰ کو یہودی رنگ دینے کی سازش کو ناکام بنائیں۔

یہ بھی پڑھیں:صیہونیوں کی ایک بار پھر مسجدالاقصیٰ پر یلغار

فلسطینی خبررساں ادارے شہاب کی رپورٹ کے مطابق مسجد الاقصیٰ کے خطیب شیخ عکرمہ  صبری نے اپنی اپیل میں کہا کہ ہم تمام فلسطینی بھائیوں اور بہنوں سے گزارش کرتے ہیں کہ بدھ کی شام سے جمعرات کی صبح تک شبِ قدر کی عبادات کے لیے مسجد الاقصیٰ کی جانب بڑھیں، تاکہ اس مقدس مقام کی حفاظت کا عملی ثبوت دیا جا سکے۔

انہوں نے عرب و اسلامی ممالک سے بھی پرزور مطالبہ کیا کہ وہ مسجد الاقصیٰ کو درپیش صہیونی خطرات کے مقابلے میں اپنا کردار ادا کریں اور اس کی مسلسل یہودی سازی کی سازشوں کو روکنے کے لیے مؤثر اقدامات کریں۔

شیخ صبری کی یہ دعوت اس وقت سامنے آئی ہے جب رمضان المبارک کے دوران فلسطینیوں کی جانب سے مسجدالاقصیٰ میں اعتکاف کرنے کے سلسلے میں کئی عوامی تحریکیں اور اپیلیں کی جا چکی ہیں۔ ان سرگرمیوں کا مقصد صرف عبادت نہیں بلکہ اس مقدس مقام کی شناخت اور حرمت کے دفاع کے طور پر بھی دیکھا جا رہا ہے۔

فلسطینی علماء اور مزاحمتی قیادت اس بات پر زور دے رہے ہیں کہ مسجد الاقصیٰ صرف فلسطینیوں کا نہیں بلکہ پوری امت مسلمہ کا مسئلہ ہے، اور اس کی حفاظت کے لیے عملی اقدامات ناگزیر ہو چکے ہیں۔