پیوٹن کی ماسکو میں دہشت گردانہ حملے کے مرتکب افراد کو دھمکی

🗓️ 25 مارچ 2024

سچ خبریں: روس کے صدر نے ماسکو میں دہشت گردانہ حملے کے ردعمل میں اپنی تقریر کے دوران اتوار 24 مارچ کو اپنے ملک میں قومی سوگ کے طور پر منانے کا اعلان کیا اور اس حملے کے ذمہ دار چار دہشت گردوں کی گرفتاری کی خبر کی تصدیق کی۔

الجزیرہ نیوز چینل کی رپورٹ کے مطابق روس کے صدر ولادیمیر پیوٹن نے ماسکو کے نواحی علاقے کروکاس میوزک ہال پر دہشت گردانہ حملے پر اپنے پہلے ردعمل میں اس حملے کو خونی اور سفاکانہ دہشت گردانہ کارروائی قرار دیا۔

یہ بھی پڑھیں: ماسکو کے کنسرٹ ہال حادثے کے بارے میں روسی حکام کا بیان

پیوٹن نے ماسکو حملے کے متاثرین کو تعزیت پیش کرنے کے لیے اتوار 24 مارچ کو قومی سوگ کے طور پر منانے کا اعلان کیا اور مزید کہا کہ ہم ان تمام لوگوں کی مدد کریں گے جو ماسکو کے کروکاس کنسرٹ ہال پر ہونے والے گھناؤنے حملے میں زخمی ہوئے ہیں،اس دہشت گردانہ حملے میں درجنوں عام شہری اور بے گناہ لوگ مارے گئے۔

انہوں نے تاکید کی کہ اس حملے کے ذمہ دار چار دہشت گرد جنہوں نے لوگوں کا قتل عام کیا، اس وقت گرفتار کر لیا گیا جب وہ یوکرین فرار ہونے کی کوشش کر رہے تھے، ہم نے 11 دیگر افراد کو بھی گرفتار کیا جو حملہ آوروں کی مدد کر رہے تھے،مجرموں نے روسیوں کو اسی طرح مارنے کے لیے سرد مہری سے گولی ماری جس طرح نازیوں نے کیا تھا۔

روس کے صدر نے دھمکی دی کہ ہم ان تمام لوگوں کی نشاندہی کریں گے جو اس حملے کے پیچھے تھے، جنہوں نے اس کی منصوبہ بندی کی اور اس کو انجام دیا، ہم انہیں منصفانہ لیکن سخت سزا دیں گے، انہوں نے کہا کہ روس کئی بار مشکل ترین امتحان پاس کر چکا ہے اور اس بار بھی ایسا ہی ہوگا۔

مزید پڑھیں: ماسکو دہشت گردانہ حملے پر امریکی ردعمل کے بارے میں روس کا ردعمل

پیوٹن نے کہا کہ کوئی بھی روسی قوم کے اتحاد اور طاقت کو متزلزل نہیں کر سکے گا اور کثیر النسل روسی معاشرے میں اختلاف کے بیج بو نہیں سکے گا، اصل مسئلہ یہ ہے کہ اس دہشت گردانہ حملے کے پیچھے جو لوگ تھے انہیں اب کوئی نیا جرم کرنے کی اجازت نہیں ہونی چاہیے۔

انہوں نے کہا کہ ہم دہشت گردی کے خطرے سے آگاہ ہیں اور ہم سے ہمدردی رکھنے والے ممالک کے ساتھ تعاون پر بھروسہ کرتے ہیں۔