پینٹاگون کا امریکہ اور روس کے درمیان براہ راست تصادم کے امکان پر انتباہ

سچ خبریں: گریگوری گییو، امریکی مسلح افواج کے شمالی کمانڈ کے سربراہ نے خبردار کیا ہے کہ یوکرین میں تنازعے کی شدت میں اضافہ امریکہ اور روس کے درمیان براہ راست فوجی تصادم کا سبب بن سکتا ہے۔

واضح رہے کہ انہوں نے امریکی کانگریس کی ایک سماعت کے لیے پیش کردہ رپورٹ میں کہا، "امریکہ اور اس کے اہم حریفوں کے درمیان براہ راست تصادم کا امکان بڑھ رہا ہے۔

جنرل گییو نے یوکرین تنازعے کے تناظر میں ایک ایسے منظرنامے کا حوالہ دیا جہاں تناؤ میں اضافہ امریکہ اور روس کے درمیان براہ راست محاذ آرائی پر منتج ہو سکتا ہے۔ ان کا کہنا تھا کہ روس کے علاوہ چین، شمالی کوریا اور ایران جیسے ممالک بھی اسی زمرے میں آتے ہیں۔ انہوں نے دعویٰ کیا کہ یہ ممالک، مغرب کے زوال کے احساس کے تحت، واشنگٹن کو للکار سکتے ہیں۔

امریکی فوج کے شمالی کمانڈ کے سربراہ نے اس بات پر بھی زور دیا کہ پینٹاگون کے نزدیک روس کی کروز میزائل کے شعبے میں بڑھتی ہوئی صلاحیتیں امریکہ کے لیے ایک سنگین خطرہ ہیں۔ گریگوری گییو نے کانگریس کی سماعت میں کہا کہ روس نے شمالی امریکہ کے خلاف اپنی فوجی صلاحیتوں میں اضافہ کیا ہے، خاص طور پر ہوا اور سمندر سے داغے جانے والے روایتی کروز میزائل کے میدان میں۔ یوکرین میں تین سالہ جارحانہ کارروائیوں نے روس کی فضائی اور بحری فوج کو قیمتی عملی تجربہ فراہم کیا ہے۔

انہوں نے بتایا کہ روس نے گزشتہ سال اپنی جنگی حکمت عملی کے تحت "اسٹریٹجک بمبار طیاروں کی گشت کی معمول کی سرگرمیاں دوبارہ شروع کی ہیں”، جس میں شمالی امریکہ کے ساحلوں کے قریب متعدد پروازیں شامل ہیں، جو اس خطے تک ان کی رسائی کو ظاہر کرتی ہیں۔ انہوں نے مزید کہا کہ روس کے بالسٹک اور کروز میزائل کی ترقی کے منصوبے بھی امریکہ کے لیے خطرہ ہیں۔