غزہ کی جنگ بے سود ہے صرف نقصان ہوا:اسرائیلی جنرل

 غزہ کی جنگ بے سود ہے صرف نقصان ہوا:اسرائیلی جنرل

 اسرائیلی فوج کے ایک ریٹائرڈ جنرل نے کھل کر تسلیم کیا ہے کہ پچھلے دو سال سے جاری غزہ کی جنگ کسی فائدے کے بجائے صرف اسرائیل کے لیے نقصان دہ ثابت ہوئی ہے۔

اسرائیلی فوجی ریڈیو کے مطابق، جنرل (ر) نمرود شفر نے کہا کہ یہ جنگ بے فائدہ ہے اور ہمیں صرف نقصان پہنچا رہی ہے۔ ہم نے غیر معمولی تعداد میں فوجی دو سال سے غزہ میں تعینات کر رکھے ہیں، لیکن جب اب تک کامیابی نہیں ملی تو مزید فوجی کارروائی کا کیا فائدہ ہو گا؟

یہ بیان ایسے وقت آیا ہے جب جمعرات کی شب اسرائیلی کابینۂ سلامتی نے وزیرِاعظم بنیامین نیتن یاہو کے اُس منصوبے کی منظوری دی ہے جس کے تحت شہر غزہ پر مکمل قبضہ کیا جانا ہے۔ اس منصوبے کو اسرائیلی اپوزیشن لیڈر یائیر لاپید نے تباہی قرار دیا ہے۔ نیتن یاہو کا یہ منصوبہ نہ صرف عالمی سطح پر بلکہ اسرائیلی فوجی و سلامتی حلقوں میں بھی سخت تنقید کا نشانہ بن رہا ہے۔

گزشتہ ایک ہفتے کے دوران اس منصوبے پر اسرائیلی سیاسی و فوجی قیادت میں اختلافات شدت اختیار کر چکے ہیں۔ فوج کے چیف آف اسٹاف نے فوجی تھکن، ساز و سامان کے بگاڑ اور ممکنہ نتائج کے پیش نظر غزہ پر قبضے کی مخالفت کی ہے، جبکہ نیتن یاہو کابینہ کے بعض ارکان، بشمول وزیرِ جنگ، اس پر اصرار کر رہے ہیں۔

واضح رہے کہ 7 اکتوبر 2023 سے جاری اسرائیلی جارحیت میں غزہ کے بے گناہ شہریوں کو نشانہ بنایا گیا ہے۔ اسرائیلی فوج بارہا رہائشی علاقوں، اسکولوں، اسپتالوں، پناہ گزین کیمپوں اور حال ہی میں امدادی مراکز پر حملے کر چکی ہے، جہاں بھوکے متاثرین کو امریکی و اسرائیلی نگرانی میں امداد فراہم کی جا رہی تھی۔