غزہ میں فوری طور پر کانکس اور خیمے بھیجنے کے لیے اسرائیل پر دباؤ ڈالا جائے:فلسطینی اتھارٹی کی اپیل

?️ 15 نومبر 2025

غزہ میں فوری طور پر کانکس اور خیمے بھیجنے کے لیے اسرائیل پر دباؤ ڈالا جائے:فلسطینی اتھارٹی کی اپیل

غزہ میں بارشوں کے آغاز اور پناہ گزینوں کی ابتر حالت کے پیشِ نظر، فلسطینی اتھارٹی نے عالمی برادری، خصوصاً امریکہ اور جنگ بندی کے ضامن ممالک سے مطالبہ کیا ہے کہ وہ اسرائیل پر دباؤ ڈالیں تاکہ غزہ میں پری فیبریکیٹڈ ہاؤسز (کانکس) اور ایمرجنسی خیموں کی ترسیل تیز کی جا سکے۔

العربیہ کے مطابق، فلسطینی اتھارٹی نے کہا ہے کہ اسرائیل نے غزہ میں پناہ گزینوں کے لیے ضروری امدادی سامان، بالخصوص خیمے اور عارضی رہائشی یونٹس کی آمد پر غیر ضروری پابندیاں عائد کر رکھی ہیں، جنہیں فوری طور پر ختم کیا جانا چاہیے۔

بارشوں کے باعث غزہ کے خیمہ بستیوں میں صورتحال مزید سنگین ہو گئی ہے۔ رپورٹس کے مطابق:غزہ میں موجود ۹۳ فیصد خیمے ناقابلِ استعمال ہو چکے ہیں۔

موجودہ ضروریات کے مطابق غزہ کو کم از کم ۲۵۰ ہزار نئے خیموں اور ۱۰۰ ہزار کانکس کی فوری ضرورت ہے تاکہ شہریوں کو عارضی پناہ دی جا سکے۔

جمعہ کے روز آنے والی طوفانی بارشوں نے درجنوں خیموں کو بہا دیا یا تباہ کر دیا، جس سے پناہ گزینوں کی مشکلات میں مزید اضافہ ہوا۔ ماہرین کا کہنا ہے کہ اگر امداد نہ پہنچی تو آنے والا موسمِ سرما انسانی بحران میں خطرناک اضافہ کر سکتا ہے۔

تیز ہواؤں اور بارشوں نے خصوصاً خان یونس کے ساحلی علاقے مواصی میں بڑی تباہی مچائی جہاں کھلے میدانوں میں لگے خیمے اکھڑ کر بکھر گئے۔

غزہ کے سول ڈیفنس کے ترجمان محمود بصل نے خبردار کیا ہے کہ علاقے میں کھنڈر بنے ہوئے مکانات کسی بھی لمحے گر سکتے ہیں، اور ہر گزرنے والا لمحہ غزہ کے شہریوں کے لیے خطرناک ہے۔ انہوں نے پناہ گزینوں سے اپیل کی کہ:

خیموں کے اردگرد ریت کے حفاظتی ٹیلے بنائیں،اور موسم کے اثرات کم کرنے کے لیے ضروری احتیاطی اقدامات اختیار کریں۔غزہ میں انسانی بحران تاحال جاری ہے، حالانکہ جنگ بندی کے ایک ماہ بعد بھی امدادی امداد کی رفتار انتہائی سست ہے اور اسرائیلی پابندیاں صورتحال کو مزید بگاڑ رہی ہیں