غزہ میں اسرائیل کی نسل کشی انسانیت کے ماتھے پر کلنک ہے: ابو الغیط

سچ خبریں:  عرب لیگ کے سیکرٹری جنرل احمد ابوالغیط نے کہا ہے کہ غزہ پٹی میں اسرائیل کی جانب سے کی جانے والی نسل کشی انسانیت کے ماتھے پر ایک کلنک کا داغ ہے، جس نے اس مظالم کو دیکھا اور سنا مگر قتل و غارت اور تباہی کے سامنے صرف ایک تماشائی بن کر رہ گئی۔

لبنان کے دارالحکومت بیروت میں منعقدہ عرب میڈیا کانفرنس کے افتتاحی اجلاس سے خطاب کرتے ہوئے انہوں نے کہا کہ فلسطینی قوم نے ایک نیا سانحہ جھیلا ہے، اور وہ ایسے وقت میں جب انسانی اقدار اور حقوق کو اولین ترجیح ہونی چاہیے تھی۔

عرب لیگ کے سیکرٹری جنرل نے امید کا اظہار کیا کہ شرم الشیخ معاہدہ اس ہولناک قتل عام کا خاتمہ کرے گا، فوری طور پر غزہ کی تعمیر نو کے اقدامات شروع ہوں گے، اور فلسطینی عوام اپنی زمین پر قائم رہیں گے تاکہ اسرائیل کا فلسطین کو اس کے باشندوں سے خالی کرنے کا وہم خاک میں مل جائے۔

ابوالغیط نے اس بات پر بھی زور دیا کہ اسرائیل بارود اور خون سے نئے مشرق وسطیٰ کا نقشہ مرتب نہیں کر سکتا۔

انہوں نے لبنان کے حوالے سے عرب لیگ کی حمایت کا اعادہ کرتے ہوئے کہا کہ صیہونی حکومت کا لبنانی زمین سے مکمل انخلاء اور سلامتی کونسل کی قرارداد 1701 کی تمام شقوں پر عملدرآمد ناگزیر ہے۔ انہوں نے مزید کہا کہ اسرائیل کی جانب سے جنگ بندی کی مسلسل خلاف ورزی مایوسی کے عالم میں لبنان میں تشویش پھیلانے اور ملک میں تقسیم پیدا کرنے کی ایک کوشش ہے، اور لبنانی عوام اس چال میں ہرگز نہیں آئیں گے۔