عین الاسد سے امریکی فوجیوں کا انخلا؛ صحرائی راستوں سے نقل و حرکت

عراقی صوبہ الانبار کے ایک ماخذ نے تصدیق کی ہے کہ امریکی فوجی دستے، عراقی حکام کے ساتھ طے پانے والے معاہدے کے تحت، مغربی عراق میں واقع عین الاسد ائیر بیس کو مرحلہ وار خالی کر رہے ہیں۔

ماخذ کے مطابق، گزشتہ کئی دنوں سے بین الاقوامی اتحادی افواج کی عین الاسد اڈے سے تیزی سے واپسی دیکھی گئی ہے۔ فوجیوں کی واپسی بڑے گروپوں کی شکل میں اور شام کے ساتھ مشترکہ سرحدی اڈے الولید کے راستے کی جا رہی ہے۔

عراقی ذرائع کے حوالے سے بتایا گیا کہ عراق میں نقل و حرکت کے لیے، امریکی فوجی اس اڈے کے مغرب میں واقع صحرائی راستوں کا استعمال کر رہے ہیں۔

بغداد اور واشنگٹن کے درمیان ہونے والے معاہدے کے مطابق، بین الاقوامی اتحادی افواج کو اس سال ستمبر تک عراق چھوڑ دینا ہے، جبکہ فوجی دستوں کے انخلا کا دوسرا مرحلہ اگلے سال دسمبر تک مکمل ہوگا۔