صیہونی فوج کے ہاتھوں فلسطینی نوجوان شہید

🗓️ 15 اکتوبر 2022

سچ خبریں:مرکزاطلاعات فلسطین کے مطابق جمعہ کی شب راملہ کے شمال میں جلزون کیمپ کے قریب اسرائیلی قابض فوج نے ایک فلسطینی نوجوان کو گولی مار کر شہید کردیا۔

مرکزاطلاعات فلسطین کی رپورٹ کے مطابق جمعے کی شب اسرائیلی قابض فوج نے رام اللہ کے شمال میں جلزون کیمپ کے قریب ایک فلسطینی نوجوان کو گولی مار کر شہید کردیا،عبرانی زبان ذرائع نے یہ بھی اعلان کیا کہ یہ فلسطینی نوجوان اسرائیلی فورسز کے ساتھ مسلح تصادم میں شامل تھا اور بالآخر اس تنازعے کے دوران اسے گولی مار کر ہلاک کر دیا گیا،ان ذرائع نے بتایا کہ بظاہر ایک اور نوجوان اس نوجوان فلسطینی شہید کے ساتھ تھا جو زخمی بھی ہوا لیکن وہ وہاں سے بھاگ گیا۔

صیہونی اخبار معاریو نے بھی صہیونی فوج کے حوالے سے بتایا کہ ان دو فلسطینی نوجوانوں نے رام اللہ کے شمال میں بیت ایل بستی میں فائرنگ کی جس کے نتیجہ میں ایک اسرائیلی آباد کار زخمی ہوا، اسرائیلی فوج نے اعلان کیا ہے کہ اس نے ان دو فلسطینی نوجوانوں پر گولیاں چلائیں جن میں سے ایک ہلاک اور دوسرا موقع سے فرار ہو گیا،دوسری جانب مقبوضہ بیت المقدس میں جمعہ کی صبح صہیونی فوجیوں کو بڑے پیمانے پر تعینات کیا گیا۔

ادھر مقبوضہ بیت المقدس کے مختلف علاقوں میں شدید جھڑپوں کے دوران 21 فلسطینی اور دو صہیونی آباد کار زخمی ہوگئے جبکہ صیہونی فورسز نے گزشتہ رات 18 فلسطینیوں کو گرفتار کیا جس سے گزشتہ دو دنوں میں گرفتار ہونے والے فلسطینیوں کی تعداد 41 ہوگئی۔