بشار الاسد کی سعودی وزیر خارجہ سے ملاقات میں کیا ہوا؟

?️ 19 اپریل 2023

سچ خبریں:سعودی وزیر خارجہ نے دمشق میں شامی صدر بشار الاسد سے اور مختلف امور پر تبادلہ خیال کیا۔

سانا نیوز ایجنسی کی رپورٹ کے مطابق شام کے صدر بشار الاسد نے پیپلز پیلس میں سعودی وزیر خارجہ فیصل بن فرحان کی میزبانی کی، سعودی وزیر خارجہ کے ساتھ ملاقات میں شامی صدر نے دو طرفہ تعلقات ، سیاسی، عرب اور بین الاقوامی معاملات نیز سعودی عرب اور شام کے درمیان دو طرفہ تعاون پر تبادلہ خیال کیا۔

سعودی وزیر خارجہ نے شاہ سلمان بن عبدالعزیز اور ولی عہد شہزادہ محمد بن سلمان کا بشار الاسد کو تہنیتی پیغام پہنچایا اور شامی قوم کی سلامتی، استحکام اور ترقی کی خواہش کی،اس ملاقات میں بشار اسد نے تاکید کرتے ہوئے کہا کہ وہ بھائی چارہ جو عرب ممالک کو آپس میں جوڑتا ہے بہت گہرا ہے اور یہ عرب ممالک کے درمیان تعلقات کی بہترین ترجمانی ہے۔

انہوں نے دونوں ممالک کے درمیان پرامن تعلقات پر تاکید کرتے ہوئے مزید کہا کہ یہ تعلقات نہ صرف دونوں ممالک کے فائدے کے لیے ہیں بلکہ عرب دنیا اور خطے کے بھی فائدے میں ہیں،بشار اسد نے دونوں ملکوں کے تعلقات کو تاریخی قرار دیتے ہوئے کہا کہ سعودی عرب کی حقیقت پسندانہ اور کھلی پالیسی عرب ممالک اور خطے کے مفاد میں ہے۔

شامی صدر نے کہا کہ شامی قوم کی حمایت کے لیے عرب بھائی چارے کا کردار ضروری ہے تاکہ وہ شام کے خلاف جنگ کے نتائج پر قابو پا کر استحکام حاصل کر سکے اور اپنی تمام سرزمین کو آزاد کرا سکے۔

دوسری جانب فیصل بن فرحان نے شام کی حکومت اور عوام کی جنگ کے نتائج پر قابو پانے اور پائیدار ترقی حاصل کرنے کی صلاحیت پر اپنے ملک کے اعتماد کے بارے میں بات کی،انہوں نے تاکید کی کہ سعودی عرب شام کی ارضی سالمیت، اس کی سلامتی اور استحکام کو برقرار رکھنے نیز پناہ گزینوں کی واپسی کے لیے ضروری پلیٹ فارم فراہم کرنے میں شام کے ساتھ ہے اور اس کی حمایت کرتا ہے۔

بن فرحان نے کہا کہ اگلا مرحلہ اس بات کا متقاضی ہے کہ عرب ممالک میں شام اور اس کے بھائیوں کے درمیان تعلقات معمول پر آئیں اور شام پہلے سے بہتر عرب اور علاقائی کردار ادا کرے۔