امریکی کانگریس کی امیدوار کی جانب سے قرآن کی بےحرمتی

امریکی کانگریس کی امیدوار کی جانب سے قرآن کی بےحرمتی

 امریکا میں آئندہ کانگریسی انتخابات کی ایک ریپبلکن امیدوار نے انتہا پسند دائیں بازو کے ووٹروں کی توجہ حاصل کرنے کے لیے نفرت انگیز اقدام کرتے ہوئے قرآن پاک کو نذرِ آتش کر دیا۔

 ٹیکساس سے کانگریس کی امیدوار والنتینا گومز نے سوشل میڈیا پلیٹ فارم "ایکس” پر ایک ویڈیو شیئر کی جس میں وہ قرآن کو آگ لگاتے ہوئے نظر آ رہی ہیں۔ اس موقع پر انہوں نے یہ دعویٰ بھی کیا کہ اگر وہ کانگریس کا انتخاب جیت گئیں تو ٹیکساس سے اسلام کا خاتمہ کر دیں گی۔

گومز، جو سابق امریکی صدر ڈونلڈ ٹرمپ کی حامی رہ چکی ہیں، نے مسلمانوں پر یہ الزام بھی لگایا کہ وہ عیسائی ممالک پر قبضہ کرنا چاہتے ہیں. انہوں نے ویڈیو دیکھنے والوں سے اپیل کی کہ انہیں ووٹ دے کر کانگریس تک پہنچنے میں مدد کریں۔

اس توہین آمیز اقدام کی شدید مذمت سیاسی رہنماؤں، مذہبی تنظیموں اور سوشل میڈیا صارفین نے کی۔ ناقدین کے مطابق، یہ واقعہ امریکا میں مذہبی تعصب اور نفرت پھیلانے کے رجحان میں اضافے کی نشاندہی کرتا ہے، خاص طور پر 2026 کے وسط مدتی انتخابات کے قریب آنے کے موقع پر۔

یہ پہلی بار نہیں ہے کہ گومز نے شہرت کے لیے اشتعال انگیزی کا سہارا لیا ہو۔ دسمبر 2024 میں انہوں نے نیویارک میں ایک ڈرامائی انداز میں ایک پُتلے پر فائرنگ کی تھی جو ’’مہاجرین‘‘ کی علامت قرار دیا گیا تھا۔ اس موقع پر انہوں نے جرائم کے مرتکب مہاجرین کی سرعام سزائے موت کا مطالبہ بھی کیا تھا۔ اس واقعے کے بعد ان کا انسٹاگرام اکاؤنٹ معطل کر دیا گیا تھا۔

اس کے باوجود گومز کو انتخابی کامیابی نہیں ملی اور وہ ریپبلکن پارٹی کے اندرونی مقابلے میں صرف 7.4 فیصد ووٹ لے کر چھٹے نمبر پر آئیں۔ 2024 میں انہوں نے ریاست میسوری کے سیکرٹری آف اسٹیٹ کے عہدے کے لیے بھی انتخاب لڑا تھا لیکن ناکام رہیں۔ اس کے بعد سے وہ توجہ حاصل کرنے کے لیے بار بار انتہا پسندانہ اور متنازع اقدامات کرتی رہی ہیں۔