امریکہ اور ایران کے موجودہ حالات روس اور یوکرین مذاکرات کو متاثر کر سکتے ہیں :زیلنسکی

امریکہ اور ایران کے موجودہ حالات روس اور یوکرین مذاکرات کو متاثر کر سکتے ہیں :زیلنسکی

یوکرین کے صدر ولودیمیر زیلنسکی نے کہا ہے کہ امریکہ اور ایران کے درمیان جاری اہم پیش رفت روس اور یوکرین کے درمیان مجوزہ مذاکرات کے وقت اور مقام پر اثر انداز ہو سکتی ہے۔

جمعے کے روز صحافیوں سے گفتگو کرتے ہوئے بتایا کہ امریکہ کی ثالثی میں روس اور یوکرین کے درمیان ہونے والے آئندہ مذاکرات کی تاریخ یا مقام میں تبدیلی ممکن ہے۔ انہوں نے کہا کہ اگرچہ اگلا دور اتوار کو ابوظبی میں متوقع تھا، تاہم اب یہ واضح نہیں کہ ملاقات کب اور کہاں ہوگی۔

زیلنسکی کا کہنا تھا کہ مذاکرات میں تمام متعلقہ فریقوں کی موجودگی انتہائی اہم ہے، کیونکہ سب کو پیش رفت کی توقع ہوتی ہے، تاہم امریکہ اور ایران کے درمیان بدلتی صورتحال ممکنہ طور پر مذاکراتی عمل کے شیڈول کو متاثر کر سکتی ہے۔

روسی صدر ولادیمیر پوتین کی جانب سے مبینہ دعوت پر ردعمل دیتے ہوئے زیلنسکی نے کہا کہ وہ دونوں ممالک کے رہنماؤں کے درمیان کسی بھی فارمیٹ میں ملاقات کے لیے تیار ہیں، مگر ماسکو میں اجلاس ان کے لیے ناقابلِ قبول ہے۔ انہوں نے بیلاروس میں ملاقات کے امکان کو بھی مسترد کر دیا۔

زیلنسکی نے کہا کہ پوتین سے ماسکو میں ملاقات اتنی ہی ناممکن ہے جتنی کییف میں ان کی ملاقات، تاہم انہوں نے روسی صدر کو علانیہ طور پر کییف آنے کی دعوت دی۔

یوکرینی صدر نے واضح کیا کہ روس اور یوکرین کے درمیان توانائی کے ڈھانچے پر حملے روکنے کے حوالے سے کوئی باضابطہ جنگ بندی معاہدہ موجود نہیں۔ ان کے مطابق یہ اقدام ایک مکمل معاہدے کے بجائے امریکہ اور سابق صدر ڈونلڈ ٹرمپ کی جانب سے پیش کی گئی ایک تجویز ہے۔

زیلنسکی نے کہا کہ اگر روس یوکرین کے توانائی کے ڈھانچے پر حملے نہیں کرتا تو یوکرین بھی اسی طرزِ عمل پر کاربند رہے گا۔

ادھر امریکی صدر ڈونلڈ ٹرمپ نے دعویٰ کیا ہے کہ روسی صدر ولادیمیر پوتین نے شدید سرد موسم کے باعث ایک ہفتے تک یوکرین پر حملے روکنے پر رضامندی ظاہر کی ہے۔