عدت کیس میں بری ہونے کے باوجود عمران خان کی اہلیہ کو رہا کیوں نہیں کیا گیا؟

?️ 9 اگست 2024

سچ خبریں: عمران خان کی اہلیہ بشریٰ بی بی کو عدت کیس میں بریت کے باوجود رِہا نہ کرنے پر عدالت نے سکریٹری داخلہ اور دیگر متعلقہ حکام سے جواب طلب کرلیا۔

پی ٹی آئی کے بانی اور سابق وزیراعظم عمران خان کی اہلیہ بشریٰ بی بی کو عدت کیس میں بری ہونے کے باوجود جیل سے رہا نہ کیے جانے کے معاملے پر اسلام آباد ہائی کورٹ کے جسٹس ارباب محمد طاہر نے درخواست کی سماعت کی، اس موقع پر بشریٰ بی بی کے وکیل، لطیف کھوسہ، عدالت میں پیش ہوئے۔

یہ بھی پڑھیں: ’غیر قانونی، غیر شرعی فیصلہ‘، عدت نکاح کیس میں سزا کیخلاف عمران خان، بشریٰ بی بی کی اپیل

وکیل نے عدالت کے سامنے دلائل دیتے ہوئے کہا کہ بشریٰ بی بی کو عدت نکاح کیس میں بریت کے باوجود رِہا نہیں کیا گیا، اور ان کے ساتھ جیل میں بدسلوکی اور تشدد بھی کیا گیا۔

عدالت نے وکیل سے کہا کہ اس نوعیت کی ایک اور درخواست بھی زیر التواء ہے، جس پر وکیل نے جواب دیا کہ وہ درخواست چیف جسٹس کے پاس ہے، جس میں مقدمات کی تفصیل فراہم کرنے کی استدعا کی گئی ہے۔

عدالت نے اس کے بعد سیکرٹری محکمہ داخلہ پنجاب اور آئی جی جیل خانہ جات کو نوٹس جاری کر دیا۔

اسلام آباد ہائی کورٹ نے وفاقی سیکرٹری داخلہ اور سپرنٹنڈنٹ اڈیالہ جیل کو بھی نوٹس جاری کرتے ہوئے اس معاملے پر جواب طلب کرلیا۔

مزید پڑھیں: ’زندہ رہا تو 10 دن میں فیصلہ کروں گا‘، عدت نکاح کیس کی سماعت 21 جون تک ملتوی

مزید برآں، عدالت نے درخواست پر اعتراضات دور کرتے ہوئے اسے چیف جسٹس عامر فاروق کے پاس اسی نوعیت کے دیگر کیسز کے ساتھ یکجا کرنے کی ہدایت دی اور سماعت 12 اگست تک ملتوی کر دی۔