یمن تنازع کے پرامن حل کے لئے سعودی کوششوں کی حمایت کرتے ہیں: ترجمان دفتر خارجہ

?️ 23 مارچ 2021

اسلام آباد(سچ خبریں)پاکستان نے یمن تنازع کے پر امن حل کے لئے سعودی کوششوں کی حمایت کا اعلان کرتے ہوئے کہا ہے کہ یمن  میں پرامن تصفیہ کیلئےسعودی عرب کےاقدام کا خیرمقدم کرتےہیں، فریقین ہزاروں بے گناہ جانیں بچانے کے لئے بات چیت کے ذریعہ مسائل حل کریں۔

ترجمان دفتر خارجہ کی جانب سے جاری بیان کے مطابق سعودی وزیرخارجہ کاامن قائم کرنےکااعلان خوش آئندہے، پاکستان اس اقدام کوصحیح سمت میں ایک قدم سمجھتاہے اور یمن تنازع کےپرامن حل کیلئےسعودی کوششوں کی حمایت کرتےہیں۔

ترجمان دفترخارجہ نے کہا کہ فریقین ہزاروں بےگناہوں کی جانیں بچانےاورعلاقائی امن کیلئےبات چیت کریں۔سعودی عرب نےیمن بحران کومذاکرات کیلئےجنگ بندی سمیت جامع روڈ میپ کی پیش کش کی ہے۔سعودی عرب نے پیر کو یمن میں بحران کے خاتمے کا فارمولا پیش کیا ہے۔ امن اقدام کے تحت صنعا ایئر پورٹ کو دوبارہ کھولنے اور الحدیدہ پورٹ پر پابندیوں میں نرمی کی اجازت دی گئی ہے۔

خیال رہے کہ سعودی وزیر خارجہ شہزادہ فیصل بن فرحان آل سعود نے کہا ہے کہ حکومت نے اقوام متحدہ کے زیراہتمام یمن سے طویل عرصے سے جاری جنگ کو بند کرنے کا منصوبہ بنایا ہے۔ذرائع کے مطابق صحافیوں سے گفتگو کرتے ہوئے ریاست کے وزیر خارجہ نے کہا کہ حوثی باغیوں کو جنگ بندی کی پیش کش کی جارہی ہے جس میں اُن کے زیر قبضہ دارالحکومت صنعا میں مرکزی ہوائی اڈے کو دوبارہ کھولنا بھی ہے۔

انہوں نے کہا کہ جیسے ہی حوثی اس پیش کش سے اتفاق کرتے ہیں یہ جنگ بندی نافذ ہوجائی گی۔ اب یہ حوثیوں پر منحصر ہے۔ شہزادہ فیصل نے زور دیتے ہوئے کہا کہ اگر حوثی نہیں مانتے تو سعودیہ اپنی سرحدوں ، شہریوں اور بنیادی ڈھانچے کی حفاظت کرتا رہے گا اور حوثیوں کو ضروری ردعمل کے ساتھ جواب دیتا رہے گا۔