پاک بھارت کشیدگی کے دوران دشمن کے سائبر حملے، ایڈوائزری جاری

?️ 7 مئی 2025

اسلام آباد: (سچ خبریں) پاکستان اور بھارت کی کشیدگی کے تناظر میں سائبر حملے کے باعث نیشنل سائبر ایمرجنسی رسپانس ٹیم نے نئی ایڈوائزری جاری کردی۔

تفصیلات کے مطابق نیشنل سائبر ایمرجنسی رسپانس ٹیم کا ایڈوائزری میں کہنا ہے کہ دشمن عناصر موجودہ حالات کا فائدہ اٹھاتے ہوئے جدید سائبر حملے کر رہے ہیں اور غلط معلومات پھیلا رہے ہیں، سائبر حملوں کا مقصد پاکستان کے اہم نیٹ ورکس کو متاثر کرنا ہے، یہ عناصر فریب پر مبنی پیغامات، فشنگ سکیمز اور جھوٹی کہانیاں پھیلا کر عوام کو گمراہ کررہے ہیں، دشمن عناصر غیر یقینی صورتحال پیدا کرنے کی کوشش کرتے ہیں۔

بتایا گیا ہے کہ ایڈوائزری میں سوشل میڈیا پر پاکستان پر سائبر حملوں سے متعلق غیرمصدقہ معلومات یا افواہیں ہرگز شیئر نہ کرنے کی سفارش کی گئی ہے، ایڈوائزری میں صارفین کو کسی بھی مشتبہ لنکس پر کلک کرنے سے گریز کرنے کی سفارش کرتے ہوئے عوام سے کہا گیا ہے کہ غیر مصدقہ پیغامات، ای میلز یا سوشل میڈیا لنکس نہ کھولیں، صرف مستند ذرائع سے معلومات حاصل کی جائیں، سرکاری یا ایمرجنسی ذرائع سے اپ ڈیٹس لیں، واٹس ایپ یا سوشل میڈیا پر گردش کرنے والی افواہوں پر یقین نہ کریں۔

واضح رہے کہ پاکستان پر بھارتی حملوں کے بعد خطے کے حالات کشیدہ ہیں، بھارت نے گزشتہ رات کے اندھیرے میں پاکستان کے شہری علاقوں پر حملہ کیا، بھارتی حملے کے بعد پاکستان کی مسلح افواج نے بزدلانہ حملے کا منہ توڑ جواب دیتے ہوئے بھارتی فضائیہ کے 3 رافیل طیاروں سمیت 5 جنگی طیارے مارے گرائے، اس دوران ایک بریگیڈ ہیڈکوارٹر سمیت متعدد فوجی چیک پوسٹوں کو بھی تباہ کردیا گیا، جس کے بعد بھارتی فوج نے ایل اوسی کے چورا کمپلیکس پر سفید جھنڈا لہرا کر شکست تسلیم کرلی۔