پاکستان اور چین کی دوستی باہمی احترام اور تعاون کی ایک لازوال مثال ہے۔ صدر مملکت

?️ 13 ستمبر 2025

اسلام آباد (سچ خبریں) صدر مملکت آصف علی زرداری نے کہا ہے کہ پاکستان اور چین کی دوستی باہمی احترام اور تعاون کی ایک لازوال مثال ہے۔

دوسرے گولڈن پانڈا انٹرنیشنل کلچر فورم سے خطاب کرتے ہوئے صدر مملکت آصف علی زرداری نے فنونِ لطیفہ، ثقافتی تعاون اور پاکستان-چین تعلقات پر روشنی ڈالی۔

صدر زرداری نے ایوارڈ جیتنے والے آرٹسٹوں کو خراجِ تحسین پیش کرتے ہوئے کہا ہے کہ فنکاروں کی تخلیقی صلاحیتیں سرحدوں کی قید سے آزاد ہو کر لوگوں کو متحد کرتی ہیں، صوبہ سچوان میں پولیٹیکل بیورو کے رکن اور وزیر پبلسٹی ڈیپارٹمنٹ لی شو لی کی مہمان نوازی پر شکریہ ادا کرتا ہوں۔

آصف زرداری نے مزید کہا ہے کہ پاکستان چین کے "تبادلہ تہذیب اور باہمی سیکھنے” کے وژن کی مکمل حمایت کرتا ہے، چین کے عالمی اقدامات GDI، GSI اور GGI اقدامات پائیدار ترقی، علاقائی استحکام اور عالمی اداروں کی شمولیت کو فروغ دیتے ہیں،

صدر مملکت نے زور دیا کہ GGI تہذیبوں کے تنوع، ثقافتی برابری اور عوامی تبادلوں کے فروغ میں اہم کردار ادا کرتا ہے، فن ایک عالمی زبان ہے جو دوریوں کو ختم کرتا ہے جبکہ پاکستان اور چین کی دوستی باہمی احترام اور تعاون کی ایک لازوال مثال ہے، ثقافت امن، خوشحالی اور مشترکہ مستقبل کے لیے ایک اہم پل ہے۔