وزیراعظم کی پولیو سے نجات دلانے کیلئے تمام وسائل بروئے کار لانے کی ہدایت

?️ 3 اگست 2021

اسلام آباد(سچ خبریں) وزیراعظم عمران خان نے پاکستان کو پولیو سے نجات دلانے کیلئے تمام وسائل بروئے کار لانے کی ہدایت کی ہے اور انہوں نے اس حوالے سے کہا ہے کہ پولیو وائرس سے ہنگامی بنیادوں پر نمٹنے کی ضرورت ہے۔گذشتہ چھ ماہ میں ملک بھر میں پولیو کا کوئی کیس رپورٹ نہیں ہوا۔

تفصیلات کے مطابق وزیراعظم عمران خان کی زیر صدارت انسدادپولیو سے متعلق ورچوئل اجلاس ہوا، جس میں چیف سیکریٹریز اور 22 اضلاع کے ڈپٹی کمشنرز نے شرکت کی جبکہ معاونین خصوصی ڈاکٹر فیصل سلطان ،ڈاکٹر شہباز گل اور دیگر حکام شریک ہوئے۔

اجلاس میں بریفنگ دیتے ہوئے بتایا گیا کہ گزشتہ 6ماہ میں ملک بھرمیں پولیو کا کوئی کیس رپورٹ نہیں ہوا، 2021میں صرف14فیصدماحولیاتی نمونےمثبت پائے گئے، ماحولیاتی نمونوں کی تعداد گزشتہ سال 56 فیصد تھی۔

بریفنگ میں بتایا گیا کہ ملک سے پولیو کے مکمل خاتمے کا ایک نادر موقع ہے، اگلے 6 سے 12ماہ اس حوالے سے انتہائی اہم ہیں۔وزیر اعظم نے ہائی رسک اضلاع کےڈی سیزکو موقع سے فائدہ اٹھانےکی ہدایت کرتے ہوئے کہا پاکستان کو پولیو کی لعنت سے نجات دلانے وسائل بروئےکار لائیں اور پولیو وائرس سے ہنگامی بنیادوں پر نمٹا جائے۔

خیال رہے ملک بھر میں 2 کروڑ 30 لاکھ سے زائد بچوں کو پولیو سے بچاؤ کے قطرے پلوانے کے ہدف کے تحت صوبہ پنجاب، سندھ، بلوچستان اور وفاقی دارالحکومت اسلام آباد میں انسداد پولیو مہم جاری ہے۔نیشنل کوآرڈینیٹر ڈاکٹر شہزاد بیگ کا کہنا تھا کہ رواں سال اب تک صرف ایک کیس رپورٹ ہوا ہے جو صوبہ بلوچستان میں سامنے آیا تھا۔