نواز شریف کی میڈیکل رپورٹ پر فواد چوہدری کا رد عمل سامنے آگیا

?️ 1 فروری 2022

اسلام آباد(سچ خبریں) تفصیلات کے مطابق وفاقی وزیر برائے اطلاعات و نشریات نے مسلم لیگ ن کے قائد کی نئی میڈیکل رپورٹ پر ردعمل دیتے ہوئے کہا ہے کہ شریف فیملی جعلی رپورٹس کا پلندہ تیار کراکے پاکستان بھیج رہی ہے ، عدالت میں نوازشریف کی بہت دلچسپ میڈیکل رپورٹ جمع کرائی گئی ، رپورٹ میں صرف یہی نہیں لکھا کہ انہیں ہائیڈ پارک کے علاوہ کہیں واک بھی نہیں کرنی چاہیئے ، اس طرح کی جھوٹی رپورٹس بھجوانے سے ان کا مقصد حل نہیں ہوگا ، اس سے گریز کریں ، امید کرتے ہیں کہ عدالت ان جعلی رپورٹس کا نوٹس لے گی ۔

فواد چوہدری نے کہا کہ نواز شریف کی جعلی میڈیکل رپورٹس کے ذریعے پاکستان کے قانونی نظام کا مذاق اڑایا جا رہا ہے ، شریف خاندان جعلی رپورٹس بھجوانے سے گریز کرے ، جو کام قانون طور پر کرنے کے ہیں ان کو سرانجام دیں ، شریف فیملی جعلی رپورٹس کی بجائے قوم کے پیسے واپس کرے ، نوازشریف عوام کا پیسہ واپس کردیں پھر لندن میں رہیں ۔ خیال رہے کہ سابق وزیراعظم نواز شریف کی تازہ ترین طبی رپورٹ لاہور ہائیکورٹ میں پیش کی گئی ہے ، سابق وزیراعظم نواز شریف کی تازہ ترین طبی رپورٹ ڈاکٹر فیاض شال کی جانب سے تیار کی گئی ، جس میں نواز شریف کو سفر کرنے سے روک دیا ہے ، اس ضمن میں کہا گیا ہے کہ نواز شریف کو علاج کی بہترین سہولیات فراہم کی جا رہی ہیں ، جب تک نواز شریف مکمل ٹھیک نہ ہو جائیں ان کے لیے سفر نہ کرنے کی تجویز ہے اور گذشتہ رپورٹ میں سفر نہ کرنے کی سفارش اب بھی برقرار ہے۔

میڈیکل رپورٹ میں کہا گیا کہ نواز شریف اینجیو گرافی کے بغیر لندن سے پاکستان نہ جائیں ، نواز شریف اگر علاج کے بغیر لندن سے پاکستان چلے گئے تو اب کی حالت بگڑ سکتی ہے کیوں کہ نواز شریف اس وقت شدید ذہنی دباؤ میں ہیں اور ذہنی دباؤ کی وجہ سے نواز شریف کی بیماری مزید بگڑ سکتی ہے۔ میڈیکل رپورٹ کے مطابق نواز شریف کو ائیرپورٹ اور عوامی مقامات پر ہرگز نہیں جانا چاہئیے ، جب تک نواز شریف کی کارنری اینجیو مکمل نہ ہو وہ ہسپتال سے دور نہ جائیں کیوں کہ کورونا اور مختلف امراض کی وجہ سے نواز شریف کی زندگی کو خطرات لاحق ہیں ، نواز شریف اس وقت اسٹریس کا شکار ہیں ، بغیر علاج واپس جا کر قید کاٹنا اور بیوی کے انتقال کا صدمہ ان کا مرض بڑھا سکتا ہے۔