ماہانہ فیول ایڈجسٹمنٹ: کراچی کیلئے بجلی 7 روپے 43 پیسے سستی کرنے کی منظوری

?️ 11 جنوری 2023

کراچی 🙁سچ خبریں) نیشنل الیکٹرک پاور ریگولیٹری اتھارٹی (نیپرا) نے کراچی کے صارفین کے لیے نومبر کے ماہانہ فیول ایڈجسٹمنٹ کی مد میں بجلی 7 روپے 43 پیسے فی یونٹ سستی کرنے کی منظوری دے دی جبکہ باقی ملک کے لیے 19 پیسے فی یونٹ مہنگی کردی۔

نیپرا نے نومبر کے ماہانہ فیول ایڈجسٹمنٹ کی مد میں کراچی کے لیے بجلی سستی اور باقی ملک کے لیے مہنگی کرنے کا الگ الگ نوٹیفکیشن جاری کیا۔

نوٹیفکیشن میں بتایا گیا کہ کے-الیکٹرک نے نومبر کے ماہانہ فیول ایڈجسٹمنٹ کی مد میں ایک ماہ کے لیے بجلی 7روپے 4 پیسے فی یونٹ سستی کرنے کی درخواست نیپرا میں جمع کرائی تھی۔

اس درخواست پر سماعت کے بعد نیپرا نے محفوظ فیصلہ جاری کر دیا۔

نوٹیفکیشن کے مطابق مطابق کراچی والوں کو جنوری کے بلوں میں 7روپے 43 پیسے فی یونٹ کمی کا ریلیف ملے گا، کے-الیکٹرک صارفین کو 10 ارب روپے سے زائد کا ریلیف جنوری کے بلوں میں دے گا۔

مزید بتایا گیا کہ کمی کا اطلاق کے-الیکٹرک کے لائف لائن اور زرعی صارفین پر نہیں ہوگا-

نیپرا کی جانب سے جاری کردہ دوسرے نوٹیفیکیشن کے مطابق کراچی کے سوا باقی ملک کے لیے نومبر کی ماہانہ فیول ایڈجسٹمنٹ کی مد میں بجلی 19پیسے فی یونٹ مہنگی کی گئی ہے جس کا اطلاق لائف لائن صارفین پر نہیں ہوگا-

نوٹیفکیشن میں بتایا گیا کہ اضافی وصولی جنوری کے بلوں میں لی جائے گی۔

خیال رہے کہ گزشتہ مہینے دسمبر میں نیشنل الیکٹرک پاور ریگولیٹری اتھارٹی (نیپرا) نے کراچی کے صارفین کے لیے اکتوبر کے ماہانہ فیول ایڈجسٹمنٹ کی مد میں بجلی 2 روپے 45 پیسے فی یونٹ سستی کرنے کی منظوری دی تھی جبکہ اس سے قبل نومبر میں ستمبر کے ماہانہ فیول چارجز ایڈجسٹمنٹ کی مد میں بجلی کی قیمت میں 5 روپے 13 پیسے فی یونٹ کم کرنے کا اعلان کیا گیا تھا۔