فواد چوہدری کا چارج سنبھالتے ہی بڑا ایکشن

?️ 2 اپریل 2022

اسلام آباد (سچ خبریں) فواد چوہدری نے وزیر قانون کا ایڈیشنل چارج سنبھال لیا۔وزیراعظم عمران خان کی منظوری سے فواد چوہدری کا بطور وزیر قانون کا نوٹیفیکیشن جاری کر دیا گیا۔ فواد چوہدری نے وزارت قانون و انصاف کا چارج سنبھالتے ہی بڑا ایکشن لے لیا۔فواد چوہدری نے عالمی سازش کے حوالے سے کمیشن قائم کرنے کی ہدایت کر دی۔

کمیشن عالمی سازش کے ذریعے حکومت تبدیلی،تحریک عدم اعتماد کا جائزہ لے گا۔کمیشن عالمی سازش کی تحقیقات کرکے اپنی رپورٹ مرتب کرے گا۔اسلام آباد ، کراچی ، لاہور میں لیگل افسران تبدیل کرنے کی ہدایت جاری کر دی گئی۔وزارت قانون و انصاف کے افسران کو فرائض بہتر انداز میں انجام دینے کی ہدایت کی گئی ہے۔ایف آئی اے کو شہباز شریف کی ضمانت منسوخی کی درخواست دائر کرنے کی بھی ہدایت کی گئی ہے۔

حکومتی ذرائع کے مطابق اپوزیشن قائدین اور منحرف پی ٹی آئی ارکان پر غداری کے مقدمات قائم کیے جا سکتے ہیں اور مقدمات قائم ہوتے ہی اپوزیشن قائدین اور منحرف ارکان کو گرفتار کیا جا سکتا ہے۔ حکومتی ذرائع کے مطابق آصف زرداری، فضل الرحمان، شہباز شریف اور بلاول بھٹو کو غداری کے مقدمے میں گرفتار کیا جا سکتا ہے۔ذرائع کے مطابق حکومتی قانونی ٹیم نے غداری کے مقدمات قائم کرنے کی مخالفت کی اور حکومت کو مشورہ دیا ہے کہ حکومت ایسے کسی اقدام سے گریز کرے۔ذرائع کے مطابق ایک رکن نے وزیراعظم سے کہا ایبسلوٹلی ناٹ۔خیال رہے کہ وزیراعظم عمران خان اور وزرا کی جانب سے تحریک عدم اعتماد کو عالمی سازش کا حصہ قرار دیا جا رہا ہے۔