صرف پنجاب میں الیکشن کرانا ملک کے خلاف سازش ہے، شہباز شریف

?️ 7 مئی 2023

اسلام آباد:(سچ خبریں) وزیراعظم شہباز شریف نے کہا ہے کہ پورے پاکستان میں الیکشن ایک ہی دن ہونے چاہییں، صرف پنجاب میں الیکشن کرانا ملک کے خلاف سازش ہے۔

لندن میں میڈیا سے نمائندوں سے گفتگو کرتے ہوئے وزیراعظم شہبازشریف نے کہا کہ سابق وزیراعظم نوازشریف کو جھوٹے اور بے بنیاد الزامات پر نااہل کیا گیا اور ایک سازش کے ذریعے 2018میں عمران نیازی کو ملک پر مسلط کیا گیا۔

وزیراعظم نے کہاکہ ثاقب نثار نے از خود نوٹس کا اختیار عوامی مفاد میں نہیں بلکہ عمران نیازی کو کامیاب کرانے کے لئے استعمال کیا وہ پی ٹی آئی اور عمران نیازی کے ایجنٹ کے طور پر کام کررہے تھے اور ان کا واحد مقصد نوازشریف کو ہرانا اور عمران نیازی کو کامیاب کرانا تھا۔

وزیراعظم نے کہا کہ آڈیو لیکس نے وہ تمام کردار بے نقاب کر دیئے ہیں جو اس سازش کا حصہ تھے اورثاقب نثار کی آڈیو لیک منظر عام پر آنے کے بعد اب اس میں کوئی شک نہیں رہا کہ عمران نیازی کو کسی بھی طریقے سے اقتدار میں لانے کے لئے سازش کی گئی تھی۔

انہوں نے کہاکہ قومی اسمبلی نے ثاقب نثار اور ان کے بیٹے کی آڈیو لیکس کے مسئلے کو اٹھایا ہے اور اس کی تحقیقات ہوں گی ۔

وزیراعظم نے کہاکہ قومی اسمبلی اور صوبائی اسمبلیوں کے انتخابات آئین کے مطابق ایک ہی روز ہونے چاہئیں ، یہ ممکن نہیں ہے کہ صوبوں میں انتخابات مختلف تاریخوں پر ہوں جس سے انتخابی نتائج پر اثر پڑے گا۔

انہوں نے کہاکہ پارلیمنٹ کا قانون سازی کا حق چھینا نہیں جا سکتا کیونکہ یہ قانون سازادارے کا آئینی اور قانونی حق ہے۔

وزیراعظم نے کہا کہ پارلیمان کے استحقاق اور اس کا آئینی اختیار کا ہر صورت تحفظ کریں گے، اس کے لیے پوری پارلیمان یکسوع ہے اور پارلیمنٹ اپنے دائرے میں رہ کر اپنے حق کو منوائے گی۔