دبئی ایئر شو: جے ایف 17 تھنڈر کی فروخت کیلئے دوست ملک کیساتھ معاہدہ پر دستخط

?️ 20 نومبر 2025

راولپنڈی (سچ خبریں) دبئی ایئر شو 2025 میں جے ایف-17 تھنڈر بلاک تھری پوری توجہ کا مرکز رہا جبکہ ایک دوست ملک کے ساتھ اس کی خریداری کے حوالے سے ایم او یو پر دستخط بھی کیے گئے۔

آئی ایس پی آر کے مطابق پاک فضائیہ کا دستہ دبئی ایئر شو 2025 میں شرکت کے لیے یو اے ای میں موجود ہے۔ پاک فوج کے شعبہ تعلقات عامہ نے بتایا کہ ایئر شو کے دوران جدید جے ایف-17 تھنڈر بلاک تھری طیارے نے غیر معمولی دلچسپی حاصل کی۔

آئی ایس پی آر کا کہنا ہے کہ معرکہ حق میں اس طیارے کی نمایاں کارکردگی نے جے ایف-17 تھنڈر کو ایک قابلِ اعتماد جنگی طیارے کے طور پر عالمی سطح پر اُجاگر کیا اور کئی ممالک نے اس میں گہری دلچسپی ظاہر کی۔

پاک فوج کے شعبہ تعلقات عامہ کے مطابق ایک دوست ملک کے ساتھ جے ایف-17 تھنڈر کی خریداری سے متعلق ایم او یو پر دستخط بھی ہوگئے جو پاکستان کے دفاعی اور صنعتی تعاون میں ایک اہم پیش رفت قرار دی گئی ہے۔

آئی ایس پی آر نے کہا کہ یہ معاہدہ جے ایف-17 تھنڈر کی بڑھتی ہوئی عالمی شہرت اور بین الاقوامی سطح پر اس پر اعتماد کی علامت ہے۔

یاد رہے کہ دبئی ایئر شو میں معروف سپر مشاق ٹرینر طیارے بھی نمائش کا حصہ تھے۔