خطہ کشمیر کے سبزہ زاروں کو مودی نے خون سے آلودہ کر دیا ہے: گورنر پنجاب

?️ 28 مارچ 2021

لاہور(سچ خبریں)گورنر پنجاب چوہدری محمد سرور نے بھارتی وزیراعظم نریندر مودی کے بنگلادیشی دورے پر ردعمل کا اظہار کرتے ہوئے کہا ہے بنگلادیشی عوام نے مودی کا چہرہ بے نقاب کر دیا ہے ان کا کہنا تھا کہ  خطہ کشمیر کے سبزہ زاروں کو مودی نے خون سے آلود کردیا ہے۔

تفصیلات کے مطابق مائیکرو بلاگنگ سائٹ ٹوئٹر پرچوہدری محمد سرور نے بنگلا دیش میں بھارتی وزیراعظم نریندر مودی کے خلاف مظاہروں کی ویڈیو شیئر کی ہے۔ٹوئٹر پر ویڈیو شیئر کرتے ہوئے چوہدری محمد سرور نے کہا کہ بھارتی ریاست گجرات کے مسلمانوں کے قتل عام کا مجرم بھی مودی ہے۔

چوہدری محمد سرور نے کہا کہ بنگلا دیشی عوام بھی مظاہروں میں مودی کا چہرہ بےنقاب کررہے ہیں۔اُنہوں نے یہ بھی کہا کہ بھارت کا جنگی جنون خطے میں امن کے لیے بڑا خطرہ بن چکا ہے، امت مسلمہ کو کشمیریوں اور بھارتی مسلمانوں کے لیے آواز بلند کرنا ہوگی۔

گورنر پنجاب نے کہا کہ کشمیر میں ہونے والے مظالم سب سے بڑی دہشت گردی ہے، کوئی شک نہیں بھارت دہشت گردوں کا سب سے بڑا سہولت کار ہے۔اُن کا مزید کہنا تھا کہ پاکستان کشمیریوں کے ساتھ چٹان جیسی مضبوطی سے کھڑا ہے۔

واضح رہے کہ بنگلہ دیش میں انڈین وزیر اعظم کے دورے کے خلاف پانچ مظاہرین کی ہلاکت کے بعد اتوار کو ملک گیر ہڑتال کا اعلان کیا گیا ہے۔اُدھر فیس بک نے کہا ہے کہ ملک کے اندر اس کی ویب سائٹ اور میسجنگ ایپ جمعے کے روز سے بند ہے۔وزیر اعظم نریندر مودی بنگلہ دیش کے 50 ویں یومِ آزادی کی تقریبات میں شرکت کے لیے وزیر اعظم شیخ حسینہ واجد کی خصوصی دعوت پر دو روزہ دورے پر جمعے کے روز ڈھاکہ پہنچے تھے۔