حکومت یا کسی اور سے بیک ڈور کوئی مذاکرات نہیں ہورہے۔ بیرسٹر گوہر

?️ 9 فروری 2026

اسلام آباد (سچ خبریں) چیئرمین پاکستان تحریک انصاف (پی ٹی آئی) بیرسٹر گوہر نے کہا ہے کہ حکومت یا کسی اور سے بیک ڈور کوئی مذاکرات نہیں ہو رہے۔

میڈیا سے گفتگو کرتے ہوئے بیرسٹر گوہر کا کہنا تھا کہ آج ہم سپریم کورٹ آئے تھے، چیف جسٹس صاحب نے مہربانی کی اور آج تمام کیسز لگائے، تین کیسز ایسے ہیں جو کل پر چلے گئے ہیں۔ انہوں نے کہا کہ ہماری 8 فروری کی کال پر پنجاب میں سختی کی گئی، لیکن سب چیزوں کے باوجود پاکستان کے عوام کا مشکور ہوں، پنجاب، بلوچستان، سندھ اور خیبرپختونخوا میں لوگوں نے احتجاج، پہیہ جام ہڑتال کی، چاہے کاروبار تھوڑے وقت بند ہو، بتانا یہ ہوتا ہے کہ ہمارا مینڈیٹ چوری نہ کیا جائے۔

ان کا کہنا تھا کہ بانی پی ٹی آئی کی جیل منتقلی سے متعلق مختلف افواہیں پھیلائی جاتی ہے، جو لوگ افواہیں پھیلا رہے ہیں یہ بالکل غلط ہے، بانی پی ٹی آئی کا جیل میں ہر دن غیرقانونی ہے، انہیں سیاسی مقدمات پر جیل میں رکھا گیا ہے۔ بیرسٹر گوہر نے کہا کہ حکومت یا کسی اور کے ساتھ بیک ڈور کوئی مذاکرات نہیں ہو رہے، بانی پی ٹی آئی نے علامہ راجہ ناصر عباس اور محمود اچکزئی کو پوری اتھارٹی دی ہوئی ہے، دونوں کی صوابدید ہے کہ وہ مذاکرات کرتے ہیں یا آئندہ کا لائحہ عمل۔

چیئرمین پی ٹی آئی کا کہنا تھا کہ لوگ زور زبردستی سے سیٹوں پر بیٹھے ہوئے ہیں اور اتنی آسانی سے ہلنے والے نہیں، 8 فروری کو ہماری 180 سیٹیں چھینی گئیں اور ہمیں 91 پر لے آئے، پھر یہ ہماری 91 سیٹوں کو کم کر کے 75 پر لے گئے، عمر ایوب کی سیٹ بھی لے لی گئی، ہمارے سینیٹرز پر بھی زور زبردستی کی گئی، یہ دوسالوں میں رتی برابر بھی عوام کے دلوں میں اپنی عزت نہیں بڑھا پائے۔