آزاد کشمیر میں ووٹنگ کا پر امن سلسلہ جاری ہے

?️ 25 جولائی 2021

مظفر آباد(سچ خبریں) انتخابات میں 45 براہ راست انتخابی نشستوں کے لیے 32 لاکھ 20 ہزار سے زاید ووٹرز حق رائے دہی استعمال کریں گے جبکہ انتخابی معرکے میں 708 امیدوار مدمقابل ہیں۔ تحریک انصاف، مسلم لیگ (ن) اور پیپلزپارٹی میں تگڑا مقابلہ متوقع ہے۔

الیکشن کمیشن آزاد کشمیر کی جانب سے انتظامات مکمل پاک فوج، رینجرز، ایف سی، پی سی، اور پولیس کے 44 ہزار جوان الیکشن ڈیوٹی کے فرائض سرانجام دے رہے ہیں۔ 250 سول و عسکری افسران کو مجسٹریٹ کے اختیارات سونپ دیے گئے ہیں۔

چیف الیکشن کمشنر جسٹس (ر) عبدالرشید سلہریا کے مطابق کسی کو الیکشن کے دوران گڑ بڑ اور شرپسندی کی اجازت نہیں ہوگی، صاف اور شفاف الیکشن کروانا ذمے داری ہے۔

آج32 لاکھ 20 ہزار 546 ووٹرز 742 امیدواران میں سے خفیہ رائے دہی سے اپنے نمائندگان کا انتخاب کریں گے جبکہ پاکستان میں بسنے والے 4 لاکھ 5 ہزار 253 کشمیری بھی ووٹ کا حق استعمال کر سکیں گے۔

الیکشن کمیشن کی جانب سے انتخابی عمل کے لیے 45 حلقوں میں مردوں کے 1398 خواتین کے 1353 اور مشترک1992 سمیت کل 6139 پولنگ اسٹیشن قائم کیے گئے ہیں۔ مجموعی طور پر 32 سیاسی جماعتیں اور سیکڑوں آزاد امیدوار قانون ساز اسمبلی کی 45 نشستوں کے لیے ہونے والے انتخابات میں حصہ لے رہے ہیں۔

انتخابات میں 826 پولنگ اسٹیشن کو انتہائی حساس جبکہ 1209 پولنگ اسٹیشن کو حساس قرار دیا گیا ہے۔ عام انتخابات پر سیکورٹی اخراجات کے علاوہ 2 ارب روپے کے قریب اخراجات آئیں گے۔ محتاط اندازے کے مطابق انتخابی عمل پر کل 4 ارب کے اخراجات متوقع ہیں۔