صہیونیوں کی غزہ کے شہریوں کو انڈونیشیا منتقل کرنے کی سازش

سچ خبریں:صہیونی حکومت ایک نئے منصوبے پر کام کر رہی ہے جس کا مقصد غزہ کے باشندوں کو ان کے وطن سے زبردستی نکال کر انڈونیشیا منتقل کرنا ہے۔ 

یہ بھی پڑھیں: ہم غزہ کے لوگوں کی جبری نقل مکانی کی اجازت نہیں دیں گے: اسپین

اسرائیلی چینل 12 کی رپورٹ کے مطابق، تل ابیب حکومت ایک نئے منصوبے پر کام کر رہی ہے جس کا مقصد نوار غزہ کے باشندوں کو ان کے وطن سے زبردستی نکال کر انڈونیشیا منتقل کرنا ہے۔

اس منصوبے کو رضاکارانہ ہجرت کا نام دیا گیا ہے، حالانکہ ماہرین اور انسانی حقوق کے ادارے اسے جبری نقل مکانی کا نیا چہرہ قرار دے رہے ہیں۔

فلسطینی خبررساں ادارے معا کے مطابق، اس سازش میں امریکہ کی پشت پناہی شامل ہے، اور تل ابیب مختلف حیلے بہانوں سے غزہ کے فلسطینیوں کو ان کی سرزمین سے نکالنے کی کوشش کر رہا ہے۔

رپورٹ میں بتایا گیا ہے کہ اسرائیلی حکومت چاہتی ہے کہ ہزاروں فلسطینی انڈونیشیا ہجرت کریں اور وہاں کام کریں، مگر حقیقت یہ ہے کہ اب تک دنیا کے کسی بھی ملک نے اس منصوبے کی باضابطہ منظوری نہیں دی۔

قابلِ ذکر بات یہ ہے کہ ماضی میں بھی صہیونی ریاست نے فلسطینیوں کی جبری ہجرت کے کئی منصوبے بنائے تھے، لیکن بین الاقوامی سطح پر مخالفت اور فلسطینی عوام کی مزاحمت کی وجہ سے یہ منصوبے ناکام رہے۔ اب ایک بار پھر رضاکارانہ ہجرت کے نام پر جبری بے دخلی کی ایک نئی کوشش کی جا رہی ہے۔

مزید پڑھیں:فلسطینیوں کی جبری نقل مکانی پر یو ای اے کے سفیر کا بیان؛ٹرمپ بھی حیران

صہیونی حکومت کا دعویٰ ہے کہ یہ اقدام انسانی ہمدردی کے تحت کیا جا رہا ہے، لیکن حقیقت یہ ہے کہ اسرائیل غزہ کو خالی کر کے فلسطینی مزاحمت کی بنیادوں کو کمزور کرنا چاہتا ہے۔

اس منصوبے کو فلسطینی قوم اور ان کی مزاحمتی قیادت کی شدید مخالفت کا سامنا ہے، جو اسے نسل کشی کی ایک اور شکل قرار دے رہے ہیں۔