مغربی کنارے میں صیہونی جارحیت کا سلسلہ جاری

سچ خبریں:مغربی کنارے میں اسرائیلی حکومت کی جارحیت اور فوجی سرگرمیوں میں اضافہ مسلسل ستائیسویں روز بھی جاری رہا۔

الجزیرہ نیوز چینل کی رپورٹ کے مطابق اسرائیلی فوج نے  مغربی کنارے کے جنوب مشرق میں واقع دیہات حرملہ اور تقوع کے درمیان سڑک پر ایک فوجی چوکی قائم کی اور فلسطینی گاڑیوں کے راستے میں رکاوٹیں کھڑی کرکے ان کی تلاشی لی، انہوں نے کچھ کاروں پر کچی گولیاں بھی چلائیں۔

یہ بھی پڑھیں: مغربی کنارے میں صیہونیوں کے ہاتھوں وسیع پیمانے پر فلسطینیوں کی گرفتاریاں

یاد رہے کہ گذشتہ رات طولکرم اور اس کے دو کیمپوں طولکرم اور نور شمس میں بھی صیہونی فوجی کارروائیوں میں شدت آئی اور صیہونی حکومت نے طولکرم کیمپ کے قریب متعدد فلسطینیوں کے گھروں پر چھاپے مارے اور ان گھروں کے مکینوں کو نکالنے کے بعد انہیں اپنے فوجی کممپ میں تبدیل کر دیا۔

درایں اثنا اسرائیلی فوج نے نابلس شہر کے مشرقی علاقے پر بھی حملہ کیا جبکہ مقبوضہ بیت المقدس میں العیسویہ گاؤں میں بھی مزاحمتی عناصر اور صیہونی حکومت کے فوجیوں کے درمیان جھڑپیں ہوئیں۔

اس کے علاوہ گزشتہ رات صہیونی آباد کاروں نے رام اللہ کے شمال مغرب میں واقع گاؤں ام صفا پر چھاپہ مارا اور گاؤں کے گھروں اور مکینوں پر فائرنگ کی لیکن کوئی جانی نقصان نہیں ہوا۔

اسی دوران آباد کاروں نے نابلس کے جنوب میں واقع گاؤں جالود پر حملہ کیا اور ایک مکان کو جلانے کا ارادہ کیا، جس سے جھڑپیں ہوئیں۔

مزید برآں بیت لحم کے جنوب مشرق میں المنیہ گاؤں میں آباد کاروں نے فلسطینیوں کے چار خیموں کو جلا دیا اور گاڑیوں پر پتھراؤ کیا۔

گزشتہ روز آباد کاروں کے ہاتھوں لاٹھیوں، رائفل کے بٹوں اور کالی مرچ کے اسپرے سے حملہ کرنے کے بعد 15 فلسطینیوں کو فریکچر اور زخمی حالت میں ہسپتال لے جایا گیا، یہ حملے اسرائیلی قابض فوج کے تعاون سے کیے گئے۔

مزید پڑھیں: مغربی کنارے میں وسیع پیمانے پر فلسطینیوں کی گرفتاریاں

کمیٹی فار ریزسٹنس ٹو دی وال اینڈ سیٹلمنٹس کے مطابق جنوری 2025 میں اسرائیلی آباد کاروں اور فوجیوں کی طرف سے فلسطینیوں کے خلاف 2160 سے زیادہ حملے کیے گئے، جن میں گولیاں، زمین کی تباہی اور املاک کی ضبطی شامل ہے۔