اسرائیل خطے کو جنگ میں کیوں دھکیلنا چاہتا ہے؟ لبنانی پارلیمنٹ اسپیکر کی زبانی

سچ خبریں:لبنان کی پارلیمنٹ کے اسپیکر نبیہ بری نے کہا ہے کہ خطے کو جنگ کی طرف لے جانے کا سب سے بڑا فائدہ اٹھانے والی فریق صہیونی ریاست ہے،انہوں نے زور دیا کہ لبنان اور اس کی مزاحمتی قوتیں جنگ بندی کے معاہدے کی مکمل پابندی کر رہی ہیں۔

یہ بھی پڑھیں:شہید نصراللہ اور اسلامی ملتیں

عرب نیوز چینل المیادین کی رپورٹ کے مطابق لبنان کی پارلیمنٹ کے اسپیکر نبیہ بری نے کہا کہ جنوبی لبنان میں پیش آنے والے حالیہ واقعات کی تفصیلات کی چھان بین ہونی چاہیے اور اس سلسلے میں لبنانی فوج، عدلیہ اور سیکیورٹی اداروں کو متحرک ہونا چاہیے۔

انہوں نے مزید کہا کہ لبنان اور اس کی مزاحمتی تنظیمیں جنگ بندی کے اصولوں کی مکمل پاسداری کر رہی ہیں اور بین الاقوامی سطح پر طے شدہ فریم ورک کے دائرے میں رہ کر کام کر رہی ہیں۔

نبیہ بری نے لبنانی سیاسی جماعتوں اور عوام سے اپیل کی کہ وہ سیاسی موقف اختیار کرتے وقت احتیاط سے کام لیں اور ریاستی اداروں کا بھرپور ساتھ دیں تاکہ دشمن کو کسی بھی قسم کا بہانہ نہ ملے۔

لبنانی پارلیمنٹ کے اسپیکر نے اسرائیل پر سخت تنقید کرتے ہوئے کہا کہ تل ابیب نے اقوام متحدہ کی قرارداد 1701 کی مسلسل خلاف ورزی کی ہے اور اب تک لبنان کے خلاف 1500 سے زائد بار جنگ بندی معاہدے کی خلاف ورزی کر چکا ہے۔

اسرائیلی فضائیہ نے جنوبی لبنان پر اس وقت بمباری کی جب چند راکٹ لبنان سے مقبوضہ فلسطینی علاقوں کی طرف داغے جانے کا دعویٰ کیا گیا۔

مزید پڑھیں: جنوبی لبنان کی صورتحال سے صہیونیوں میں خوف و ہراس

یہ کارروائی اسرائیل کی جانب سے ایک اور جارحیت کے طور پر دیکھی جا رہی ہے، جس سے علاقے میں کشیدگی مزید بڑھنے کا خدشہ پیدا ہو گیا ہے۔