امریکہ کا شام کے ساتھ 12 سال بعد سفارتی رابطہ

?️ 21 دسمبر 2024

سچ خبریں:امریکی وزارت خارجہ کے ترجمان نے اعلان کیا ہے کہ ایک امریکی سفارتی وفد نے جمعہ کے روز دمشق میں دہشت گرد گروہ تحریر الشام کے نمائندوں سے ملاقات اور مشاورت کی۔

المیادین نیوز چینل کی رپورٹ کے مطابق، امریکی وزارت خارجہ کے ترجمان نے تصدیق کی کہ امریکی سفارتی وفد نے دمشق میں تحریر الشام کے نمائندوں کے ساتھ ملاقات کی ہے۔

یہ بھی پڑھیں: امریکی سفارتکاروں کی تحریر الشام کے رہنماؤں سے ملاقات

ترجمان نے مزید کہا کہ اس ملاقات میں شام میں اقتدار کی منتقلی کے اصولوں اور خطے کی تازہ صورتحال پر بات چیت کی گئی۔

ترجمان نے اس بات پر زور دیا کہ تحریر الشام کے ساتھ ملاقات میں داعش کے خلاف اقدامات پر بھی گفتگو کی گئی اور اس سلسلہ میں مشترکہ حکمت عملی پر تبادلہ خیال ۔

امریکی عہدیدار کے مطابق، سفارتی وفد نے شام کی سول سوسائٹی، سرگرم کارکنوں اور مختلف فرقوں کے نمائندوں سے ملاقات کی۔ اس کے علاوہ، بشار الاسد کے دور میں گمشدہ ایک امریکی صحافی اور دیگر شہریوں کی قسمت پر بھی تبادلہ خیال کیا گیا۔

دمشق میں امریکی سفارتخانے نے بھی تصدیق کی کہ مشرقِ وسطیٰ کے لیے امریکی نائب وزیر خارجہ نے آج تحریر الشام کے نمائندوں سے ملاقات کی۔ اس ملاقات میں اردن کے شہر عقبہ میں ہونے والی کانفرنس میں طے پانے والے نکات پر گفتگو کی گئی۔

مزید پڑھیں: شام پر قابض دہشتگردوں کے امریکہ کے ساتھ تعلقات؛امریکی اخبار کی رپورٹ

سفارتخانے کے مطابق، اس ملاقات میں شام میں شامی عوام کی قیادت میں ایک جامع سیاسی عمل کی حمایت، انسانی حقوق کے احترام پر مبنی حکومت کی تشکیل، اور دہشت گردی کے خلاف مشترکہ کوششوں کی اہمیت پر تبادلہ خیال کیا گیا۔