صیہونی پابندیوں کے باوجود ہزاروں روزہ داروں کی مسجد الاقصی میں حاضری

?️ 23 فروری 2026

سچ خبریں:بیت المقدس کی انتظامیہ نے اعلان کیا ہے کہ سخت فوجی پابندیوں اور داخلی رکاوٹوں کے باوجود دسیوں ہزار فلسطینیوں نے مسجد الاقصی میں نماز ادا کی، جبکہ صیہونی اقدامات کے باعث سینکڑوں افراد کو داخلے سے روکا گیا۔

بیت المقدس  کے گورنر ہاؤس نے ایک بیان میں اعلان کیا ہے کہ فوجی چوکیوں اور مسجد الاقصی کے دروازوں پر سخت شناختی جانچ کے باوجود دسیوں ہزار افراد روحانی فضا میں مسجد میں موجود رہے۔

یہ بھی پڑھیں:صیہونیوں کی پابندیوں کے باوجود کتنے فلسطینی مسجد اقصیٰ حاضر ہوئے؟ 

بیان میں کہا گیا ہے کہ قابض افواج نے بیت المقدس کے اندر، اس کے اطراف اور مسجد الاقصی کے دروازوں پر اپنے فوجی اقدامات میں شدت پیدا کر دی ہے تاکہ نمازیوں کی رسائی محدود کی جا سکے۔

یہ بھی بتایا گیا کہ حالیہ دنوں میں بیت المقدس کے 300 سے زائد باشندوں کو ماہ مبارک کے دوران مسجد الاقصی میں داخلے سے روکنے کے احکامات جاری کیے گئے ہیں۔

علاقائی میڈیا کے مطابق ان تمام پابندیوں اور سخت اقدامات کے باوجود، اتوار کی شام تقریباً 50 ہزار افراد نے مسجد الاقصی میں نماز عشاء اور تراویح ادا کی۔

اس سے قبل مسجد الاقصی کے خطیب شیخ عکرمہ صبری نے اپنے بیان میں کہا تھا کہ قابض صہیونی رژیم نے تقریباً ایک ماہ پہلے ہی رمضان کے دوران نمازیوں پر پابندیاں عائد کرنے کی منصوبہ بندی شروع کر دی تھی، اور ان اقدامات کا مقصد القدس میں مسلمانوں کی موجودگی کو کم کرنا ہے۔

انہوں نے ایک ٹی وی گفتگو میں مزید کہا کہ قابض افواج سکیورٹی جواز کا سہارا لے کر ہزاروں مسلمانوں کی وسیع شرکت سے ناخوش ہیں اور ان منصوبوں کا ہدف شہر القدس اور اس مقدس مقام میں مسلمانوں کی تعداد کو گھٹانا ہے۔

مزید پڑھیں:مسجد اقصیٰ پر بن گور کے حملے پر حماس کا ردعمل

خطیب مسجد الاقصی نے تاکید کی کہ رواں سال نافذ کی گئی پابندیاں گزشتہ برسوں کے مقابلے میں زیادہ سخت اور کشیدگی پیدا کرنے والی ہیں۔